Депутат суук түшкөнүнө байланыштуу окуучуларга он күнгө дем алыш жарыялоону сунуштады

Бүгүн, 25-январда Жогорку Кеңештин жалпы жыйынында депутат Камчыбек Жолдошбаев суук түшкөнүнө байланыштуу окуучуларга он күнгө дем алыш жарыялоону сунуштады. Эл өкүлү өлкө аймагында суук аба ырайы өкүм сүрүп жаткандыктан окуучулар ооруга чалдыгып калбашы үчүн, күн жылыганга чейин дем алыш берүү керектигин айтты.

"Эшикте -30... -40 градуска чейин суук боло баштады. Балдар мектепке бара албай, барса кагаз кармай албай кыйналып жатат. Ошондуктан 10 күн же бир жумага дем алыш берсек. Тоолуу райондордо, шаардын ичинде -30... -40 градус деген өтө суук. Ошондуктан балдар мектепке күн жылыгандан кийин барса болот. Калчылдап эртең менен саат 7де туруп үшүп, тоңуп оорулуу болуп калат. Балдар биздин келечегибиз болгондон кийин ушул маселеге көңүл бурсак", - деди Жолдошбаев.

Депутат Улан Примов да Жолдошбаевдин сунушун колдоду.

"Айыл жеринде мектептерге баруу кыйынга турууда. Жер-жерлерде жалпы эле билим берүү багытында бир жума дем алыш берүү сунушун колдойт элем", - деди Примов.

Автор: Мунарбек Жоргомов