Рак илдетинен улам көзүнөн, мурдунун бир бөлүгүнөн ажыраган Баназаров дарылануусун Индияда улантат. Ага 7 миң доллар карапайым элден топтолду

Рак илдетинен улам бир көзүнөн, мурдунун бир бөлүгүнөн жана үстүңкү эрининен айрылган Баатыр Баназаров дарылануусун Индияда улантат. Бул тууралуу маалыматты кечээ, 6-февралда SUPER.KG порталына ага жардам берип, каражат топтоп жаткан Нурсултан Батыралиев билдирди.

Анын айтымында, бейтап ооруканада 8 күн дарыланып, үйгө чыгарылган. Учурда жардамдан топтолгон каражатка Бишкек шаарынан батирге акча төлөнүп апасы экөө жашап жатат.

"Баатырдын абалын айтып, жардам сурап кайрылгандан бери биз ачкан эсепке 6 миң 400 доллар каражат топтолду. Мындан тышкары бизге чейин жаш дарыгерлер да атайын эсеп ачып, акча ошол жакка топтоло баштаган эле. Алар 32 миң сомду, кийин дагы топтолгон 11 миң сомду алып келип беришти. Ошентип 7 миң доллар каражат чогулду. Бул акча жалаң гана жөнөкөй жарандардын жардамы менен топтолду. Көпчүлүгүн чет жерде иштеп жүргөн мигранттар салышты", - дейт Батыралиев.

Ошондой эле ал Баатырдын Индияга барып дарылануусуна каражат жетишсиз болуп жатканын айтты.

"Дагы 2 миң доллардан ашык каражат керек болуп жатат. Кыргыз элинин арасында боорукер, кайрымдуу адамдар көп экен, ушунча каражат топтолду. Эми дагы азыраак акча топтолсо Индияга барып келгенине жетип калмак. Буга чейин Жогорку Кеңешке барып 120 депутатка даректелген кайрылуу каттарды таштап келгем, бир да катка жооп болгон жок. Министрликтерден, мамлекеттик кызматтардан да эч кандай көңүл буруу болгон жок", - деп кошумчалады ал.

Ал эми Баатырды онкологиялык ооруканага жаткырып, азыркы учурда күн сайын үйүнө келип, бетин дарылап таңып берип жаткан Улуттук онкологиялык борбордун дарыгер-ординатору Азамат Кошалиев буларга токтолду.

"Баатырдын абалы оор бойдон, мен жана менин тааныш дарыгер досторум келип кабар алып турабыз. Учурда ооруну сездирбөөчү дары-каражаттарды берип жатабыз. Биз Баатырдын сүрөттөрү менен илдеттери тууралуу Түркияга, Индияга жана башка өлкөлөргө жөнөттүк. Алардын ичинен ылайыктуусу жана каражат жагынан да арзаныраагы Индиядагы клиника болуп чыкты. Андагы онкологиялык бөлүм дүйнөдөгү күчтүү делген оорукана болуп эсептелинет экен. Ал жакта бейтапка диагноз коюлат, андан кийин 4-5 курс химиялык дарылоо жүргүзүлөт. Ошонун негизинде калган дарылоолор кандай жүргүзүлөрү белгилүү болот. Атам онкологиялык борбордо иштегендиктен биргеликте биздин жабдыктарды жакшылап изилдеп чыксак, Баатырдын бети канап кетчүдөй болуп жатат. Ошондуктан аларда жабдыктар жакшы болгондуктан ошол жакка алып барууну туура деп таптык", - деди ал.

Ошондой эле дарыгер Баатыр Баназаров Индияга бара тургандыгын уккандан бери маанайы көтөрүлүп калгандыгын белгиледи.

Айта кетсек, буга чейин Жалал-Абад облусуна караштуу Аксы районунун 32 жаштагы тургуну Баатыр Баназаровдун абалы күндөн күнгө начарлап жаткандыгы маалымдалган. Ал апасы менен Бишкек шаарына келип, кайрымдуу адамдардан жардам чогултула баштаган. Кийин Улуттук онкологиялык борборуна жаткырылып, дарыгерлер анын 12 жылдан бери рак илдети менен күрөшүп келгендигин билдирген.

Жардам көрсөтүүнү каалагандар үчүн Саткын Баназарованын байланыш номери 0773679822.