Абакта ачкачылык кармап жаткан саясатчылардын тарапташтары Ак Үйдүн алдына митингге чыгышты (фото)

Бүгүн, 14-февралда абакта ачкачылык кармап жаткан саясатчылардын тарапташтары Ак Үйдүн алдына митингге чыгышты.

Анда Саясий куугунтуктан коргоо комитетинин төрагасы Сапар Аргынбаев ачкачылык кармап жаткандар УКМКнын төрагасы Абдил Сегизбаевдин отставкасын талап кылып жатканын эскертти. "Саясий куугунтукту уюштуруп, саясатчыларды мыйзамсыз камап жаткан Абдил Сегизбаев жооп берсин. Убагында Сегизбаев "Белизгейт" деп ошол кездеги президент Алмазбек Атамбаевге кагаздарды көрсөтүп, Өмүрбек Текебаевди камоого аракет кылган. Ошол кезде Атамбаев "Белизгейт" боюнча маалымат чындыкка дал келбесе Сегизбаев жооп берет деп айткан. Канча убакыт өттү, Сегизбаев жооп бере элек. Ачкачылык жарыялап жаткандар Абдил Сегизбаевдин отставкага кетишин жана жоопко тартылышын талап кылышууда", - деди Аргынбаев.

Оппозициячыл Бектур Асанов, Кубанычбек Кадыров жана Эрнест Карыбеков 30-январдан тарта абакта кургак ачкачылык кармап жатат.

Белгилей кетсек, өткөн жылы 17-апрелде Бишкек шаарынын Биринчи Май райондук соту "Элдик парламенттин" мүчөлөрү боюнча чечим чыгарган. Ага ылайык, Бектур Асанов менен Кубанычбек Кадыров Кылмыш-жаза кодексинин 27 (кылмышка даярдануу) жана 295-беренелери (бийликти күчкө салып тартып алуу) боюнча күнөөлүү деп табылып, 12 жылдан эркинен ажыратылышкан. Жаза өтөө мөөнөтү 2016-жылдын 24-мартынан тарта эсептелет.

Эрнест Карыбеков Кылмыш-жаза кодексинин 339 (кылмышты жаап-жашыруу) жана 292-берене (мамлекеттик чыккынчылык) боюнча күнөөлүү деп табылып, үй-мүлкүн конфискациялоо менен 20 жылга кесилди. Жаза өтөө мөөнөтү 2016-жылдын 26-мартынан тарта эсептелет.

Ал эми Дастан Сарыгулов Кылмыш-жаза кодексинин 339-берене (кылмышты жаап-жашыруу) боюнча күнөөлүү деп табылып, 4 жылга эркинен ажыратылган. Анын үч жылына шарттуу өтөө жазасы белгиленген.

7-февралда райондук соттун чечимин Бишкек шаардык сот күчүндө калтырган.

2016-жылдын март айында "Элдик парламенттин" бир канча мүчөсү кармалып, аларга карата кылмыш иши ачылган. Дастан Сарыгулов, Эрнест Карыбеков, Бектур Асанов жана Кубанычбек Кадыров "бийликти басып алууну пландоодо" деген негизде камакка алынган.