"Ата Мекен" партиясынын юристтерине байланыштуу соттук отурум 27-февралга жылдырылды

Бүгүн, 13-февралда Бишкек шаардык сотунда "Алмазбек Атамбаевдин кадыр-баркына шек келтирди" деп айыпка жыгылган Өмүрбек Текебаевдин жактоочуларынын иши боюнча соттук отурум болбой калды. Бул тууралуу SUPER.KG`ге айыпталуучулардын бири Канатбек Азиз билдирди.

"Биздин ишти караган судья жумушчу иш сапары менен башка жакка кетип калганына байланыштуу отурум жылып кетиптир. Кийинки отурум 27-февралда саат 15:30га белгиленди", - деди ал.

2017-жылдын 1-март күнү Өмүрбек Текебаевдин жактоочулары Таалайгүл Токтакунова жана Канатбек Азиз кырсыкка кабылган Боинг учагындагы жүк ошол учурдагы президент жана анын үй-бүлөсүнө таандык экенин далилдеген документтер бар экенин билдиришкен болчу. Башкы прокуратура "билдирүүдө өлкө башчысынын кадыр-баркына жана ар-намысына шек келтирилген" деп Таалайгүл Токтакунова менен Канатбек Азизди сотко берген.

2017-жылдын 4-июлунда Бишкектин Октябрь райондук соту "Ата Мекендин" юристтерин "жалган маалымат менен президентти каралады, айтылган маалыматтар чындыкка дал келбейт" деген негиз менен 10 миллион сом айып пулга жыккан. Октябрь райондук сотунун чечимин Бишкек шаардык соту 2017-жылдын 18-августунда күчүндө калтырса, 2017-жылдын 30-ноябрында Жогорку Сот да биринчи инстанциянын чечимин күчүндө калтырган.

Бишкек шаарынын Октябрь райондук соту Өмүрбек Текебаевдин жактоочусу Таалайгүл Токтакунованын мүлктөрүн камакка алган. Камакка алынган мүлктөрдүн арасында автоунаа, батир жана жер тилкеси бар.

Автор: Бекболот Сарыбаев