Бишкекте ырчы Кайрат Примбердиевдин "Поезддеги махабат" ырына тартылган клиптин бет ачары болду

Бүгүн, 10-мартта Бишкекте ырчы Кайрат Примбердиевдин “Поезддеги махабат” аттуу ырына тартылган клибинин бет ачары болду. Клипке алгачкылардан болуп ырчылар Курал Чокоев, Кубаныч Сатаев жубайы Кундуз Авашова менен, клиптин жаратуучулары, музыкалык продюсер Тынчтыкбек Кожобеков, тамада, кечелердин алып баруучусу Манас Алыкулов, Кайрат мырзанын жакындары күбө болушту. Коноктор клип тууралуу ойлорун ортого салып, ырчыга чыгармачылык ийгилик каалашты.

“2014-жылдын аягында “Биз” тобунун аталган чыгармасын "Ретро дискотекада" ырдап чыккам. Эл бул ырды жакшы кабыл алып, күйөрмандарымдын сунушу менен клип тартып, бет ачарын өткөрүп жатабыз. Менин апам соодагер болгондуктан, поездге түшүп алып Казакстан, Өзбекстан, Тажикстанды кыдырчубуз. Поездде чогуу бараткан эжелер ушул ырды тынбай угушканынан кулакка сиңип калган эле. Кийин бул ырды аткарып чыгам деп максат кылып койгом. Буюрса, тилегим ишке ашып отурат. Клип темир жолдон тартылды. Башкы каармандын ролун өзүм ойносом, мен ашык болуп калган кызды келинчегимдин сунушу менен ырчы Айгүл Чалова аткарды”,- деди К.Примбердиев.