Кыргыз жылдыздары Малайзияга чакырылышты

Малайзияга чакырылган жылдыздар Гүлнур Сатылганова менен Гүлжигит Калыков

"Тамашоучу" жигиттер Эмил Эсеналиев жана Самат Эркинбек уулу

Буга чейин кыргыз журналисттеринен жана маданият өкүлдөрүнөн турган чыгармачыл топ Малайзияга барарын жазган элек . Убакыт өтүп, иш-чара тууралуу кененирээк маалымат алуу мүмкүнчүлүгү түзүлдү.

Иш-чараны уюштуруу иштери менен алектенип жаткан "Ала-Тоо" уюмунун активисти Сагындык Балтабаев бүгүн, 26-майда SUPER.KG`ге маек курду. Ал Малайзияга кимдер жана алар кандай максатта бара жатканы тууралуу толук айтып берди.

- Сагындык мырза, бул иш-чаранын негизги максаты тууралуу айтып берсеңиз...

- Иш-чаранын негизги максаты - эки элдин жакындашуусуна жана өнүккөн өлкөлөрдүн катарына кирген Малайзиянын тажрыйбасын жакындан көрүп-билүүгө шарт түзүү. Чакырылган журналисттер Малайзиянын массалык маалымат каражаттарынын иштөө өзгөчөлүгү, туризм жана билим берүү тармагындагы жетишкендиктери тууралуу тийиштүү мекемелерге барышып, жакындан маалымат алышат. Мындан сырткары кыргыз эстрадасынын белгилүү ырчылары да Малайзиядагы мекендештерге өз өнөрлөрүн тартуулашмакчы.

- Малайзияга кыргыз жеринен баруучу топ такталдыбы, такталса алар кимдер?

- Ооба, такталды. Айтып кеткендей, кыргыз мамлекетиндеги бир нече ири массалык маалымат каражаттарынын өкүлдөрү, ошондой эле белгилүү жылдыздар Гүлнур Сатылганова менен Гүлжигит Калыков, “тамашоучулар” Самат Эркинбеков, Эмил Эсеналиевдер барышат. Биздин уюм иш-чараны уюштурууга гана жардам бергени болбосо, негизги жүк Кыргыз Республикасынын Малайзиядагы элчилигинде. Элчи Кылычбек Султанов бул иш-чарага кетүүчү чыгымдарды, каражат маселесин өзүнө алган.

- Каражат деп калдыңыз, алыскы Малайзияга бир канча кишини алып барып, алып келүү оңойго турбаса керек?

- Ооба, албетте. Биз мындан да көп жылдыздарды чакырууга кызыкдар элек. Каражаттын тартыштыгынан улам чектелүүгө туура келди. Мисалы, ар бир кишиге жатакана, тамак-аш үчүн орточо эсеп менен 2500 доллар сарпталат. Учурдан пайдаланып айта кетейин, эгерде ушул топ менен Малайзияга барууну кайсы бир белгилүү ырчы кааласа, учак билети эки тарапка 1000 доллардын айланасында. Ошол каражатты төлөп барса болот. Калган жатакана, тамак-ашка кетчү чыгымдарды биз өз моюнубузга алабыз.

- Жакшы экен, каалоочулар силер менен кантип байланыша алышат?

- Биз сиздердин портал менен (ред. SUPER.KG) иштешип жатпайбызбы. Ошондуктан Малайзияга барууну каалаган ырчылар болсо, сиздерге кайрылганы туура болот го. Биз сиздер менен байланышып, маал-маалы менен кабар алып турабыз да.

- Маегиңизге рахмат!

Автор: Максат Кудайбердиев