Белгилүү актриса Анжелина Жоли сириялык качкындар жайгашкан лагерде жамгыр алдында калганына карабай маалымат жыйын өткөрдү

Актриса жамгырдын жааганына карабай маалымат жыйын өткөрүүсүн уланткан.

Жоли качкындардын турак жай шарттарын жеке өзү көзөмөлдөп чыккан.

Бүткүл дүйнөгө белгилүү актриса Анжелина Жоли карьера, үй-бүлө жана БУУдагы элчилик жумушун да калтырбай алып кетүүгө үлгүрүүдө. Себеби актриса бир күнү Англияда жолдошу Брэд Питтин жаңы тасмага тартылып жаткан жерде аны колдоп-коштосо, экинчи күнү үй-бүлөсү менен Лос-Анжелес шаарында. Андан сырткары Жоли согуш жүрүп жаткан аймактарга барып качкындарды коргоо жана колдоо боюнча иш-чараларды да уюштурууга жетишүүдө. Бул тууралуу чет элдик "Hello.ru" басылмасы жазып чыкты.

Актриса 15-март күнү Сирия менен чектешкен жерден 15 чакырым алыстыкта жайгашкан Ливандагы Захла шаарында сириялык качкындардын көйгөйлөрү тууралуу атайын маалымат жыйын өткөрдү. Сыртта катуу жамгыр жаап жатканына карабастан, Жоли маалымат жыйынына чогулгандарга Европада жана Жакынкы Чыгыштагы качкындардын тагдыры тууралуу Женевадагы сүйлөшүүлөрдүн жыйынтыгы боюнча кеңири маалымат берди. "Бүткүл дүйнөдө башкаруу органдары түзүлүшү керек. Бул нерсе бийликтегилерге качкындарга кандай жардам көрсөтүү керектигин жана болуп жаткан окуяны анализдеп, түшүнүүгө чоң салым кошот",- деди ал өз сөзүндө.

Айта кетсек, 2014-жылдын июнь айында Улуу Британиянын канайымы Елизавета II Анжелина Жолинин гуманитардык ишмердигин баалап, ага кавалер айым титулун ыйгарган болчу.

Автор: Турсунай Алымкулова