Бишкектин борбордук бөлүгүндө сырткы жарнакты жайгаштырууга тыюу салуу сунушталды

Депутат Өмүрбек Текебаев "Жарнак жөнүндө" мыйзам долбоорун коомдук талкууга чыгарды.

Текебаевдин айтымында, бул мыйзам долбоорунун максаты – Кыргыз Республикасынын борбор шаарын заманбап көрүнүшкө келтирүү. "Бишкекте жарнактык такталардын саны өтө көп, 1421 даана (Г, П, Т түрүндө). Алардын ичинен ири габариттүүсү 732 даана (мегаборддор), орточо стандарттагысы 689 даана. Жарнактык такталар шаардын борбордук бөлүгүндө: Манас, Чүй кең көчөлөрүндө жана Байтик баатыр көчөсүндө арбын жайгашкан, бул борбор шаарга такыр жол бербей турган жагдай", - дейт Текебаев.

Мыйзам долбооруна ылайык, Ю.Фучик-Жибек-Жолу-Шабдан баатыр-И.Ахунбаев көчөлөрү менен чектелген Бишкек шаарынын борбордук бөлүгүндө сырткы жарнактын төмөнкү каражаттарын жайгаштырууга тыюу салынат:

- пилондор (бургучтар);

- сити-борддор (сити-борддун жарнактык тегиздигинин бир жагынын өлчөмү 3x4 метрден ашык эмес, жарнак түшүрүлгөн сүрөттүн өлчөмү 3x2 метрди түзөт);

- аялдамаларда, көчөлөрдүн боюнда жайгашкан Г, П, Т түрүндөгү такталар (жарнактык тегиздигинин өлчөмү 6x3 метр жана 4x9 метр түзөт), ошондой эле көчөнүн өтө турган бөлүгүнө жана газондордун үстүнө таянычтары түшкөн такталар;

- суперборддор (суперборддун жарнактык тегиздигинин бир жагынын өлчөмү 12х4 метр, жарнак түшүрүлгөн сүрөттүн өлчөмү 12х4 метр);

- Г, П, Т түрүндөгү суперсайттар (суперсайттын жарнактык тегиздигинин бир жагынын өлчөмү 15x5 метр, жарнак түшүрүлгөн сүрөттүн өлчөмү 15х5 метр);

- арка (жарнактык тегиздигинин өлчөмү 24х5 метр, 12х3 метр, 6х3 метр);

- транспаранттар;

- аянты 3x4 метрден кем эмес жарнактык аянтка ээ сырткы жарнак каражаттары, конструкция;

- жана башкалар.

Бул берененин талаптары кыймылсыз мүлктүн объектилерине (имараттар, курулмалар ж.б.) бириктирилген жер тилкелеринде жана жакшыртылган жана салттуу эмес жарнак объектилеринде жайгаштырылган сырткы жарнактын кичи форматтагы каражаттарына тарабайт.

Автор: Нургазы Аматов