Мексика менен АКШнын ортосундагы дубалдын калган бөлүгүн курууга 25 миллиард доллар керектелет

Мексикадагы Трамптын жарнамасы

Мыйзамсыз мигранттарды көмгөн жер

АКШда дарылануу кымбат болгондуктан, айрым америкалыктар Мексиканын Лос-Альгодонес шаарында дарыланышат

Лос-Альгодонестеги кафе

Чек арадагы сууда сүзүүгө тыюу салынган

Бул жерде мыйзамсыз мигранттар жүрүшкөндүктөн, жалгыз жүрүү кооптуу.

25-январда АКШнын президенти Дональд Трамп Мексика менен АКШнын чек арасына дубал куруу боюнча буйрукка кол койгон. Чек аранын узундугу 3 миң 145 чакырым. Бүгүнкү күндө 1078 чакырымы тосулган. Дубалдын негизги бөлүгү Жорж Буштун буйругу менен 2006-жылы курулган. Ага ылайык, 1100 чакырым дубал 6 миллиард долларга курулмак, бирок кымбат болгондуктан, бул иш аягына чыкпай калган.

2010-жылы Мексика менен болгон чек араны кайтарууга 20 миңден ашуун патрулдук кызматкерлер тартылган. Чек арада 57 көзөмөл өткөрүү пункту бар, күнүнө миллиондой адам өтөт. Миграциялык саясий институтунун маалыматына ылайык, АКШдагы иммигранттардын көбү Мексикадан келишкендер. 2015-жылдын статистикасына ылайык, Мексикадан АКШга 11 миллион 643 миң мексикалык көчкөн. Бул иммигранттардын 26,9 пайызын түзөт. Иммигранттардын саны боюнча экинчи орунда Индия турат. Ал жактан АКШга 2 миллион 390 миң индиялык келген.

Мексикалыктардын көбү чек арадан мыйзамсыз түрдө өтүшөт. Трамп бул дубалды 10 миллиард доллардан 12 миллиардка чейин курууга баалайт. Бирок шайлоо алдындагы дебат учурунда 4 миллиард деген. Ал эми эксперттердин эсеби боюнча, курулушка 25 миллард доллардай кетет.

Автор: Үмүт Абдраимова
Фото: Guillermo Arias, Jim Watson