ЖЫЛНААМА, 3-МАРТ: Кыргыз Республикасынын мамлекеттик туусунун бекитилгенине 25 жыл болду

Мындан 25 жыл мурун, 1992-жылы 3-мартта Кыргыз Республикасынын мамлекеттик туусу Жогорку Кеңеш тарабынан бекитилген. Желектин ортосуна алтын түстөгү бирдей өлчөмдө кырк нур болуп чачыраган күнгө окшош тегерек жайгаштырылган. Күндөй төгөрөктүн ичинде кыргыз боз үйүнүн түндүгү кызыл түстө берилген. Желектин туурасы анын узундугунун бештен үч бөлүгүн түзөт. Жаркыраган төгөрөктүн диаметри желектин туурасынын бештен үч бөлүгүн түзөт. Күн жана нур чачыраган дискалардын диаметрлеринин салыштырмалуулугу бештен үч бөлүгүнө барабар. Түндүктүн диаметри жаркыраган төгөрөктүн диаметринин жарымын түзөт.

Желектин бир түстүү кызылдыгы эрдикти жана тайманбастыктын символу, жаркыраган алтын күн бейкуттукту жана байлыкты чагылдырат, ал эми түндүк - үй кутунун символу, аалам катары дүйнөнү алда канча кеңири түшүнүүдө бир айлампага бириктирилген кырк нур байыркы кырк уруунун бирдиктүү Кыргыз мамлекетине бириккендигин айгинелейт. Түндүк өлкөдө жашап жаткан элдин биримдигинин символу, желектин кырмызы түсү айкөл Манастын туусунун түсү болгон. Авторлору: Эдил Айдарбеков, Бекбосун Жайчыбеков, Сабыр Иптаров, Жусуп Матаев жана Маматбек Сыдыков.

3-мартка карата жылнаама

Автор: Саадат Токтоболот кызы