Ошту таза суу менен камсыздоо үчүн долбоор ишке ашканы менен, жетиштүү көлөмдө суу чыкпай жатат

Ош шаарында жаан жаап, сел жүргөн күндөрү таза суу токтоп тургундар үчүн ыңгайсыздыктарды жаратып келет. Шаардыктарга суу Ак-Буура дарыясынан алынат. "Ош шаардык суу канал" ишканасынын башчысы Ормош Осмоновдун SUPER.KG'ге берген маалыматы боюнча, Ак-Бууранын суусу кирдегенде ишкананын суу тазалоочу станциясы иштетилбейт.

"Шаарга суу Ак-Буура дарыясынан алынат. Дарыядагы суу биздин станцияда тазаланып, шаарга берилет. Сел жүрүп, жаан жааган маалда дарыя суусу кирдегендиктен, сууну тазалоочу станция иштетилбей токтотулат. Себеби станция андай кир сууну тазалай албайт. Бул СССР маалындагы станция. Шаарды таза суу менен камсыздоо үчүн секундасына жок дегенде 800 литр суу болушу керек. Ал эми суу кирдеген күндөрү секундасына болгону 200 литр суу келет. Ал суу Кулатов менен Черёмушки кичи райондорундагы үйлөрдүн 1-кабатына гана жетет. Тилекке каршы, Оштун аймагында скважина куруу жолу менен да суу алуу мүмкүн эмес экен. Шаар куруу жана архитектура боюнча Ош шаардык башкы башкармалыгы шаарды таза суу менен толук камсыздоо үчүн тиешелүү курулуштарды куруп бермек", - деди Ормош Осмонов.

Үстүбүздөгү жылдын февраль айында Ош шаарынын мэри Айтмамат Кадырбаев №5-насостук станцияга куюлуп жаткан сууну агызбоо үчүн узундугу 1040 метр, диаметри 400 миллиметр болгон полиэтилен түтүктөрү №3/7-насостук станцияга тартылганын билдирген. Андан улам, дарыяга агып жаткан ашыкча суу уланган түтүкчө аркылуу Черёмушка, Кулатов кичи райондоруна, Жапалак аймактык кеңешине жана Кеңеш айылына бурулуп, таза суу берилмек. Ал эми былтыр 16-мартта ачылган суу кампа Керме-Тоо, Ак-Тилек, Жапалак аймактарын таза суу менен камсыздай турганы белгилүү.

Шаар куруу жана архитектура боюнча Ош шаардык башкы башкармалыгынын башчысынын биринчи орун басары Алтынбек Токошев Ош шаарын таза суу менен камсыздоочу долбоор аткарылып бүткөнү менен, суунун көлөмү күтүлгөндөй болбой калганын айтат.

"Ошту таза суу менен камсыздоо иши Жалал-Абад жана Ош шаарын калыбына келтирүү боюнча мамлекеттик дирекция тарабынан башталган. Кийин мамлекеттик курулушка өткөн. Испаниялык "Epida" компаниясы шаарды таза суу менен камсыздоо боюнча долбоорду даярдаса, аны немис ишканасы ишке ашырган. Алар менен кошо "ГипроСтрой" ишканасы субподряддыкка тартылган. Долбоор боюнча суу топтоочу жайга секундасына 800 литр суу келиши керек болчу. Бирок долбоор аяктагандан кийин күтүлгөндөй көлөмдө суу келбей калды. Азыр кимдир-бирөөнө күнөө коюу эрте. Учурда суунун көлөмүн көбөйтүү боюнча "ЮгСтройСервис" ишканасы тарабынан иштер аткарылып жатат", - деген Алтынбек Токошев бул жаатта кандай иштер аткарылып жатканы тууралуу так маалымат айта албастыгын билдирди.

"Ош шаардык суу канал" ишканасынын сунушу боюнча таза сууну скважина аркылуу чыгаруу да каралганы маалым болду. Алтынбек Токошевдин айтымында, скважина менен да керектүү көлөмдө суу чыкпай калганына байланыштуу бул долбоор токтотулган.

Ал эми испаниялык компаниянын жазган долбоору боюнча салынган курулуш сууну дренаждык жол менен алып жатканы белгилүү болду.