Бишкекте жаратылыш коюнунда эркин китепканалар пайда болду (фото)

Бишкектеги Эркиндик бульварында чакан китеп салынуучу жайлар пайда болду. Бул долбоордун авторлорунун бири Атай Самыйбек уулунун айтымында, борбор калаада мындай китепканалардын саны 12ге жетет. Шаар тургундары алардын ичине китептерди салып, окугусу келгендер аны алып кетишет.

"Бул идеяны былтыр демилгелеп чыкканбыз. Ал мэрия тарабынан колдоого алынып, дизайнерлер менен иштешип, оюбузду ишке ашырдык. Максатыбыз - элибизди китеп окууга чакырып, алардын бири-бири менен китеп алмашуусуна, баарлашуусуна, шаар маданиятын өнүктүрүүгө көмөктөшүү", - деди активист.

Китепканаларда каттар үчүн дагы орун бар. Ага шаар тургундары туулган жерине болгон каалоо-тилектерин, ырын же арманын жазып, тарткан сүрөттөрүн салып койсо болот. Долбоордун өкүлдөрү аларды социалдык тармактагы баракчалары аркылуу жарыялап турушат.

Автор: Саадат Токтоболот кызы
Фото: Саадат Токтоболот кызы