Шайлоодо колдонула турган урналар көрсөтүлдү (фото)

Бүгүн, 6-октябрда Бишкекте президенттик шайлоого арналган тегерек стол өтүүдө. Анда бюллетендер салына турган автоматташтырылган урналар көрсөтүлдү.

Иш-чаранын жүрүшүндө айрым катышуучулар урнанын айнегинен шайлоочу кимге добуш берип жатканы көрүнбөгөнүнөн күмөн санады.

Борбордук шайлоо комиссиясынын төрайымы Нуржан Шайлдабекова добуш берүүнүн жашыруундуулугун сактоо комиссиянын башкы милдети экенин айтты. Эч ким шайлоочунун добуш берүү жыйынтыгын алдын ала биле албай турганын эскертти.

Мамлекеттик каттоо кызматынын төрагасы Дастан Догоев күмөн санаган адамдарга бул боюнча текшерип көрүүнү сунуштады. Буга байланыштуу ортого урна алып келинип текшерилди. Шайлоочу кимге добуш бергени айнектен эч кимге көрүнбөгөнү байкалды.

Автор: Жылдыз Джускембаева
Фото: Жылдыз Джускембаева