"Соттордун Ак Үйдөгү куратору" деген атка конгон Манасбек Арабаевдин ордуна жаңы кадр келди

Сооронбай Жээнбеков президенттик аппараттын соттук реформа жана мыйзамдуулук бөлүмүнүн башчысы кызматына Санжар Исабаевди дайындады. Бул тууралуу аталган аппараттын басма сөз кызматы билдирди.

Өмүр баяны:

Исабаев Санжар Мамадиярович 1981-жылы туулган. 2004-жылы Кыргыз-Орус Славян университетин аяктаган. Юстициянын 3-класстагы кеңешчиси.

2005-жылдан 2015-жылга чейин Жогорку Соттун аппаратында улук референт, улук консультант, бөлүм башчысы жана Жогорку Соттун төрайымынын жардамчысы болуп эмгектенген.

2015-жылдан 2016-жылга чейин президенттин аппаратынын соттук реформа жана мыйзамдуулук бөлүмүндө эксперт болуп иштеген.

2016-жылдын апрель айынан 2018-жылдын май айына чейин Бишкек шаардык сотунда судьялык кызматты аркалаган.

Айта кетсек, буга чейин президенттик аппараттын соттук реформа жана мыйзамдуулук бөлүмүнүн башчысы кызматын 2015-жылдын февралынан 2018-жылдын 15-майына чейин Манасбек Арабаев аркалап келген. Ал "саясий жетекчиликтин ишениминен чыкты" деген жүйө менен иштен алынган. Буга чейин Арабаевдин дарегине "Ак Үйдөн туруп сотторго кураторлук кылууда" деген сындар айтылып келген.

Автор: Бектур Токтоноев