Бишкек мэриясы талкуу жараткан автокинотеатр алынарын билдирди

28-сентябрда социалдык тармактарда Бишкек шаарындагы "Ынтымак" сейил багындагы автокинотеатрда эротикалык тасма көрсөтүлүп жаткандыгы боюнча видео тараган. Бишкек мэриясы бул окуя боюнча билдирүү жасады.

"Бүгүнкү күндө А.Тыныбекова аттуу жаран унаа токтотуу үчүн ижарага берилген жерге автокинотеатр орнотуп алган. Ага берилип жаткан электр энергиясы өчүрүлдү. Ижарага берилген жерди туура эмес максатта пайдаланып жаткандыгы үчүн келишимди токтотуу тууралуу кат жөнөтүлдү. Келишим токтотулгандан кийин автокинотеатр алынат", - деп билдирди Бишкек мэриясынын басма сөз кызматынан.

Мындан тышкары, Октябрь райондук милициясы бул иш боюнча Жазык кодексинин 130-беренеси (порнографиялык материалдарды таратуу) менен сотко кайрылуу жасайт.

Автор: Адилет Керимбек уулу