Депутат: "Айып пулдун көлөмү чоң дегендер жол кыймылынын эрежесин бузбасын"

"Айып пулдун көлөмү чоң дегендер жол кыймылынын эрежесин бузбасын", - деп бүгүн, 8-октябрда Жогорку Кеңештин комитет жыйынында депутат Камчыбек Жолдошбаев билдирди.

"Жаран эрежени сактап унааны айдаса айып пул салынбайт. Байкабай эреже бузгандарга карата айып пулдун көлөмүн азайтып, спирт ичимдигин ичкен, баңгизат колдонгондордукун көбөйтүп коюу керек", - дейт Жолдошбаев.

Учурда "Тартип бузуу жөнүндө кодексине өзгөртүү киргизүү" тууралуу мыйзам долбоору каралып жатат. Бул боюнча баяндаманы мыйзам долбоорунун демилгечилеринин бири депутат Кубанычбек Жумалиев жасап жатат.

Жумалиев билдиргендей, мыйзам долбоору тактоо иретинде киргизилип жатат. "Айып пулдар жашоо-шартка ылайыктуу болсун деген көп сунуштар түшкөн. Айып пулдардын көлөмүн тактап айта албайбыз, бул өкмөттүн иши. Айып пулду азайтса болот деген тактоолорду кабыл алып берсеңер, өкмөт сумманы өзү аныктайт", - дейт Жумалиев.

Автор: Жылдыз Джускембаева