Ошто Кадырбек Досонов бара жаткан унаа жол эрежесине баш ийбей кармалды

Ошто "Женго" каймана аты менен уюшкан кылмыштуу топтун мүчөсү катары белгилүү болгон Кадырбек Досонов бара жаткан унаа жол эрежесине баш ийбей, жол кыймылынын кызматкерлери тарабынан кармалды. Бул тууралуу Ош ОИИБинин басма сөз кызматынан билдиришти.

Маалыматка ылайык, бүгүн, 15-октябрда облустук башкармалыктын ыкчам тобу жана жол кыймылынын кызматкерлери биргеликте рейд өткөрүшкөн. Рейддин жүрүшүндө мамлекеттик номери жок бара жаткан Мерседес-Бенц унаасын токтотушкан. Бирок унаанын айдоочусу токтогон эмес. Артынан кууп барган кызматкерлер унаада Кадырбек Досонов бар экенин аныкташкан.

"Айдоочунун жанында травматикалык тапанча болгон. Учурда териштирүү иштери жүрүүдө. Ал эми айдоочуга мамлекеттик номердин жоктугу, жол кыймылынын кызматкерлерине баш ийбегендиги жана курду такпагандыгы үчүн 3 протокол түзүлүп, айып пул салынды. Андан соң алар коё берилди", - деди басма сөз кызматынан.

Автор: Айсалкын Качкынбекова