Шашылыш билдирүү! Өлкөдө 21-ноябрдан 24-ноябрга чейин туруксуз аба ырайы күтүлөт

Өлкөнүн көпчүлүк аймактарында бүгүн жана алдыңкы 2 күн ичинде мезгил-мезгили менен жаан, тоо этектеринде жана тоолуу райондордо кар жаашы, айрым жерлерде жаан-чачын катуу жаашы күтүлөт. Бул тууралуу Өзгөчө кырдаалдар министрлигинин басма сөз кызматынан билдиришти.

Маалыматка ылайык, 21-ноябрдан 24-ноябрга чейинки жаан чачындуу аба ырайынан улам, ток өткөргөн электр чубалгыларына жана бактарга суу кар жабышышы күтүлөт. Жолдор тайгак жана тоңголок болуп, райондордо кар күрткүсү күтүлөт. 21-27-ноябрда абанын температурасы кескин төмөндөйт.

Батыштан соккон шамалдын ылдамдыгы секундасына 4-9 метрге жетет. Бүгүн, 21-ноябрда кээ бир райондордо шамалдын ылдамдыгы 15-20 метрге жетиши күтүлөт. Мындай туруксуз аба ырайы энергетика жана коммуналдык кызматтардын ишин жана жайлоолордо малды кармоону кыйындатып, катуу жамгыр жааган убакта унаа жолдордо көрүү аралыгы төмөндөп, унаалардын жүрүшүн жайлатат.

Автор: Бактыгүл Султаналиева