Жалал-Абад. Базар-Коргон элинин 10 пайызы гана таза суу менен камсыз болгон

Жалал-Абад облусуна караштуу Базар-Коргон районунда 162 миң калк болсо, анын 10 пайызы гана таза суу менен камсыздалган. Бул тууралуу бүгүн, 16-августта аталган райондун акими Таалайбек Долдоев билдирди. Райондо көп кабаттуу 5 үйдүн биринде да таза суу жок. Жашоочулар сууну сырттан ташып ичет. Буга чейин ал үйлөрдүн алдына 3 насос коюлуп, суу чыгарылганын айтат аким. "Жакында ички каналдар оңдолот, ага жумшалчу 192 миллион сомду банктардын бири каржылайт",- дейт Долдоев. Ал кошумчалагандай, таза суу боюнча дагы бир долбоор жазылып жатыптыр, ал ишке ашса, райондогу 138 миң жашоочу таза суу менен камсыз болот.

Автор: Кенже Тынымбек кызы