"Орто-Сай" базарында түрттүрүү иштери жүргүзүлдү (фото)

Жер пайдалануу жана курулуш башкармалыгы шаарды мыйзамсыз объектилерден тазалоо иштерин улантууда. Бул тууралуу Бишкек шаардык мэриянын басма сөз кызматынан билдиришти.

Маалыматка ылайык, атайын бөлүм "Орто-Сай" соода-базар комплексинин айланасын, Октябрь районунун борбордук көчөлөрүн, Максим Горький көчөсүн Ауэзов көчөсүнө чейинки бөлүктү тартипке келтирди.

"Жалпысынан мыйзамсыз орнотулган 24 штандер жана 36 баннер алынды. Ошондой эле, Чыгыш-5 кичи районунда мыйзамсыз орнотулган эки күркө алынып, 36 чарчы метр муниципалдык жер бошотулду.

Бизге, шаардыктардан Көк-Жар конушундагы унаа токтоочу жайга орнотулган темир тосмонун мыйзамдуулугун текшерүү өтүнүчү менен кайрылуу келип түшкөн. Биз аталган жерге барып, түшүндүрүү иштерин жүргүзгөндөн кийин шаардыктар тосмолорду өз ыктыярлары менен бузушту", - деп айтылат маалыматта.

Мэрия жерди пайдалануу жана курулуш эрежелерин сактоо, ошондой эле мыйзамсыз же туура эмес орнотулган объектилер жөнүндө кайрылууларды 0777 14 74 93 номерине билдирип коюуну өтүнөт.

Автор: Гүлзина Каныбекова