Дубайда топ кыздар энеден туума жылаңач болушуп фотосессия уюштурушту. Эми алар 6 айга камалышы мүмкүн

Дубайдын Марина аймагында асман тиреген имараттын балконунда жылаңач болуп сүрөткө түшкөн кыздар коомдук бузукулукка айыпталып кармалды. Бул тууралуу дүйнөлүк басылмалар жазып чыгышты.

Маалыматка ылайык, 3-апрель күнү интернетте ондон ашык жылаңач аялдын балкондо тизилип турганын көрсөткөн видеолор жана сүрөттөр тараган. Дубайдын полициясы бул окуяга тиешеси бар бир топ адамды камакка алып, алардын иши мамлекеттик прокуратурага жиберилгенин билдирген.

"Бул өтө начар жүрүм-турум. Эмират коомунун баалуулуктарына жана этикасына туура келбейт", - деп айтылган полициянын билдирүүсүндө.

Маалыматта кыздар Орусиянын, Украина, Молдавия жана Беларустун жарандары экендиги жазылат. Бириккен Араб Эмирлигинин мыйзамдары боюнча, фотосессиянын бардык катышуучуларына 1350 доллардан айып пул салынат же 6 айга камакка алынат.

Бириккен Араб Эмирлиги Жакынкы Чыгыштагы мамлекеттердин арасынан либералдуу өлкө катары каралганы менен, сөз эркиндигине байланышкан катуу мыйзамдары бар. Жарандар интернеттеги комментарийлери жана видеолору үчүн камалат. Ошондой эле ири порнографиялык сайттарга кирүүгө тыюу салынган. "Адеп-ахлакка туура келбеген иш аракеттер" үчүн жарандар алты айга чейин камакка алынып, 5000 AED ( болжол менен 115 миң сом ) өлчөмүндө айып пул төлөйт.

Автор: Самира Шарипова