"Баш сөөгү, тиштери сынып, колу күйүп, буттарын үшүк алган". Казакстанда 3 жашар кызын сабап өлтүргөн 22 жаштагы келинге соттун чечими чыкты

Казакстандын Петропавловск шаарында 3 жаштагы кызын сабап өлтүргөн 22 жаштагы келинге соттун өкүмү чыкты. Бул тууралуу казак басылмалары жазып чыгышты.

Маалыматка ылайык, өз кызын өлтүргөнгө айыпталган Екатерина Голешованы сот 10 жыл 5 айга эркинен ажыратты. Ал кызын никесиз төрөп, балдар үйүнө өткөрүп жиберген. Андан соң туугандары кызды өз камкордугуна алышкан. Көп өтпөй наристени энеси өзү багууга бел байлаганын айтып, туугандарынан алып койгон. Аял күнөөсүн толугу менен моюнга алган. Ошондой эле анын мурда эч жерде иштебегендиги жана соттолбогондугу айтылат.

Мындай үрөйдү учурган окуя ушул жылдын январь айында орун алган. Дарыгерлер кичинекей кыздын баш сөөгү жана тиштери сынганын, колу күйүп, буттарын үшүк алганын айтып, кызды сактап калууга колдон келген аракеттерин жасаганы менен ал каза болуп калган.