Ырчылар, акындар, актёрлор... Өлкөнүн маданият кызматкерлерине мамлекеттик сыйлыктар тапшырылды (сүрөт)

Президент Садыр Жапаров республиканын маданий, интеллектуалдык жана руханий дараметин өнүктүрүүгө салым кошкон көп жылдык үзүрлүү эмгеги, ошондой эле Кыргыз Республикасынын эгемендүүлүгүнүн 30 жылдыгына байланыштуу бир катар маданият ишмерлерине мамлекеттик сыйлыктарды тапшырды. Бул тууралуу президенттин администрациясынын маалымат кызматынан билдиришти.

Ага ылайык, мамлекет башчысы куттуктоо сөзүндө көп жылдан бери өз тармактарында үзүрлүү иштеп, өлкөдө улуттук маданиятты жайылтууда адистердин жасаган эбегейсиз эмгегин белгиледи.

"Садыр Жапаров маданият ишмерлеринин өлкөнүн өнүгүшүнө кошкон салымын жогору баалап, алардын улуттук баалуулуктарды жана каада-салттарды сактап, келечек муунга жеткиргени үчүн ыраазычылыгын билдирди.

Президент өлкө жетекчилиги маданият чеберлерин бул багытта колдойт жана алардын чыгармачылык иштеринин жигердүү болушу үчүн зарыл нерселердин баарын жасайт деп ишендирди", - деп жазылат маалыматта.

Автор: Айжанар Рыспек кызы
Фото: Президенттин администрациясынын маалымат кызматы