Таалайбек Ибраевге энергетика министринин милдеттери убактылуу жүктөлдү

Энергетика министринин орун басары Таалайбек Ибраевге министрдин милдеттери убактылуу жүктөлдү. Бул тууралуу президенттик администрациянын маалымат кызматынан кабарлады.

"Өлкө башчы Садыр Жапаров кол койгон жарлыкка ылайык, энергетика министри жок болгон мезгилде министрдин орун басары Таалайбек Ибраевге министрдин милдеттерин аткаруу жүктөлдү",- деп айтылат маалыматта.

Буга чейин Доскул Бекмурзаев тергөө аяктаганча кызматынан убактылуу четтетилгени кабарланган.

Белгилей кетсек, Башкы прокуратура кечээ энергетика министри Доскул Бекмурзаевге карата кызматтык абалынан кыянаттык менен пайдалануу фактылары боюнча 2 кылмыш иши козголгонун кабарлаган.

Ала арада Бекмурзаев ага карата козголгон кылмыш иштерин анын атын каралоо үчүн жасалган кыңыр иш деп эсептей турганын билдирген.

Автор: Бек Оморбеков
Фото: Интернеттен алынды