Бишкекте аялга орой мамиле жасап, коомдук жайда сөгүнгөн таксист кармалды. Бул тууралуу кечээ, 21-ноябрда Октябрь райондук ички иштер башкармалыгы билдирди.
Маалыматка караганда, социалдык тармактарга жүргүзүлгөн мониторинг учурунда айдоочунун коомдук жайда сөгүнүп, агрессивдүү мамиле жасап жаткан видеосу аныкталды. Милиция кызматкерлери 1994-жылы туулган М.А. аттуу жарандын өздүгүн аныктап, райондук башкармалыкка жеткиришти.
Ага карата Укук бузуулар жөнүндө кодекстин 126-беренеси (Майда бейбаштык) боюнча чара көрүлүп, убактылуу кармоочу жайга киргизилгени маалым болду.