Жоомарт Оторбаевди "өкмөт башчылыкка жалгыз талапкер" деп айтууга эрте экенин билдирди КСДПнын лидери

Ушу тапта өкмөт башчы менен министрлердин курамы боюнча гана сүйлөшүү жүрүүдө. Мамлекеттик мекеме, ишканалардын жетекчилери тууралуу сөз болбойт, аларды дайындоо - премьер-министрдин укугу. Муну бүгүн, 26-мартта КСДП фракциясынын лидери Чыныбай Турсунбеков “Парламент” радиосунун түз байланышында билдирди.

“Азырынча “Ата Мекен” фракциясы Жоомарт Оторбаевди премьер-министрлик кызмат ордуна өз талапкери катары атады. Андан башка да сунуштар түшүшү мүмкүн. Кыскасы, бардык фракциялардын бул жөнүндө пикири менен таанышып чыккандан кийин гана талапкер боюнча бирдиктүү чечим кабыл алынат”,- дейт ал.

Турсунбеков өкмөт башчылыкка татыктуу адамдар көп экенин, бирок талапкер көпчүлүк коалицияга кирүүнү каалаган бардык фракциялардын колдоосуна ээ болууга тийиш экенин кошумчалады.

Автор: Автандил Добулбеков