"Продюсерлер" уюму “Көк салкын-2” тасмасы "пираттык" жол менен тарап кеткендигине байланыштуу тийиштүү органдарга кайрылуу жасашты

“Көк салкын-2” тасмасынын "пираттык" жол менен тарап кеткендигине нааразы болгон "Продюсерлер" уюму бүгүн, 9-апрелде маалымат жыйынын өткөрүп, тийиштүү органдарга кайрылуу жасашты. Жыйынга белгилүү режиссёр Садык Шер-Нияз, продюсер, ырчы Съездбек Искеналиев, режиссёр Камчыбек Жумабаев, Талант Кандыбаев катышты.

“Көк салкын-2” тасмасы Нарын, Каракол, Балыкчы шаарларында "пираттык" жол менен сатылып кетти. Фильмди тартуу иштерине 50 миң доллар сарпталган. Биз сапаттуу тартуу үчүн үй, машинабызды күрөөгө койгонбуз. Фильм өзүн актай электе минтип күйүп кеттик. Тасманын диски сатылып жаткан жеринен кармалган. Бирок тийиштүү органдар чара көрбөй жатышат. Биз мамлекеттик органдарга "пираттык" менен алектенген жарандарга катуу чара көрүп берүүнү суранар элек. Чет өлкөлөрдө мындай диск менен кармалсаң, катуу жаза аласың. Бизде болсо 50 миң сом зыян алып келгени аныкталбаса, жоопкерчиликке тартылбайт экен. Тасма ким тараптан тарап жатканы белгисиз. Учурда буга карата экспертиза иш алып барууда. Тарап кеткен дискти көрүп чыктык. Кинозалдан тартылып алынды дейин десең, элдин каткырыгы угулмак да”,- дейт продюсер Талант Кандыбаев.

Белгилей кетсек, аталган фильмдин бет ачары үстүбүздөгү жылдын 6-февралында болгон.

Автор: Динара Абдыкадырова