Чолпон-Ата шаарындагы азиз жана көзү жакшы көрбөгөн балдарга комузда ойноо үйрөтүлүүдө

24-апрелден 1-майга чейин Чолпон-Атада “Жаштардын көйгөйлөрүн чыгармачыл аракеттенүү менен чечүү” долбоорунун негизинде үчүнчү семинар өткөрүлгөн. Семинарга көз оорусунан жабыркаган балдардын мектеп-интернатынын окуучулары жана борбордогу жогорку окуу жайлардын студенттери катышышкан. Иш-чаранын жүрүшүндө 12 бала тандалып алынып, учурда алар “Эн белги” системи менен комузда ойногонду үйрөнүп жатышат.

Белгилей кетсек, “Эн белги” системи - бул мелодияны эзелки угулуусунда аткарууга, өзүнүн репертуарын көбөйтүүгө, импровизация чеберчилигин жана ойноо техникасын курчутууга, элдик мелодияларды үйрөнүүгө мүмкүнчүлүк берет.

“Эн белги” методикасын интенсивдүү үйрөнүүдөн тышкары семинардын программасына катышуучулардын ар тараптуу өнүгүшүнө арналган иш-чаралар уюштурулган.

"Бул долбоорду “Сорос-Кыргызстан” фондунун көмөгү аркылуу “Айгине” маданий-изилдөө борбору ишке киргизген. Долбоордун отчёттук концерти 26-майда Т.Сатылганов атындагы Улуттук филармонияда өтөт",- деп билдиришет уюштуруучулар.

Автор: Динара Абдыкадырова