"20дагы чал-кемпир" тасмасынын бет ачарына Бакыт Тынайбеков сүйүктүүсү менен келди (фоторепортаж)

Тасмадагы кадрлардан.

Каармандар жана тартуучу топ тасма башталарда элге көңүлдүү маанай каалап өтүштү.

Кызыл килемден тасманын оператору Жоомарт Чалабаев өтүүдө.

Тасмадагы шаардык кыз Айканын ролун жараткан Эльзат Жедигерова.

Бакыт Тынайбеков кызыл килемден сүйүктүүсү менен чогуу өттү.

Гүлдүн баарын жыйнап кызыл килемден өткөн Замира Сатыбалдиева.

Дамир Абдраимов кызы менен жетелешип келди.

Тасманын бет ачарын уюштурган уюштуруучулар да кызыл килемден басып өтүштү.

Тасманын режиссёру Айбек Өмүров кызыл килемдин үстүнөн басып келүүдө.

Ачылыш азем "Ио" бий тобунун бийи менен башталды.

Ачылыш аземдин жүрүшүнөн.

70 жаштагы кемпирге айланган Айканын ролун Эльзат Жедигерова аткарды.

Жаш жигиттен 70 жаштагы чалга айланган Бакыт Тынайбеков.

Тасманын дагы бир башкы каарманы Алмакан апанын ролун Замира Сатыбалдиева ойноду.

Тасманын башкы каарманы Өмүш аксакалдын ролун актёр Дамир Абдраимов жараткан.

"Манас" кинотеатрынын алдындагы цементте отурган 87 жаштагы апа "Бул жерде отургуч жок экенин билбептирмин. Болбосо үйдөн кичинекей отургучумду көтөрө келмек экенмин, муздак жерге отурбай" деп кейип алды.

Эң жаш көрөрмандар тасманын башталышын чыдамсыздык менен күтүп жатышты.

Ачылыш аземге даярдык жүрүүдө.

15-майда "Манас" кинотеатрында Айбек Өмүровдун "20дагы чал-кемпир" тасмасынын бет ачары болуп өттү. Ага тасмадагы каармандар, тартуучу топ, алардын жакындары, ырчылар жана маалымат каражаттарынын өкүлдөрү катышышты. Саат 10:00гө белгиленген бет ачар бир аз кечигип башталды. Эл алдына чыккан алып баруучу тасманын бет ачар аземин ачык деп жарыялады. Мындан соң тасманын башкы каармандары жана тартуучу топтун мүчөлөрү кызыл килемден өтүштү.

Тасманын мазмунуна токтолсок, анда Асылбаш айылында күн өткөргөн абышка-кемпирдин жашоосу, алардын бир түндө 20 жаштагы жигит менен кызга айланышы чагылдырылат. Чоң ата небересине мурасын өткөрүп берүү үчүн аны шаардан айылга чакырат. Абышка ага гектарлаган жерди көрсөтүп, "Бул ата-бабабыздан бери мурастан мураска өтүп келе жаткан жер. Көзүмдүн тирүүсүндө сага тапшырып коюуну чечтим" дейт. Анда небереси "Ата, бул жерди сатса канча акча болот?" деп сурайт. Муну уккан абышканын маанайы түшүп, түн ортосунда туруп көктү карап "Жаратканым, балдарыма ыйман бере көр!" деп жалбарат. Дал ушул түнү чал-кемпир 20 жаштагы кыз-жигитке, тагыраак айтканда, небереси менен анын сүйүктүүсүнүн кейпин кийип калышат. Тасма мындан ары кызыктуу окуялар менен коштолуп отурат.