Жалал-Абаддын аймагындагы 2 миң чакырымдан ашуун ички чарбалык каналдар жана арыктар тазаланды

Жалал-Абад облусунун сугат тармагын жазгы талаа жумуштарына даярдоо боюнча бир катар иштер жүргүзүлүп, 2014-жылдын 1-майына карата 2347 чакырым ички чарбалык каналдар, арыктар тазаланды. Бул тууралуу жергиликтүү өкүлчүлүктүн басма сөз кызматынан билдиришти.

Маалыматка ылайык, ички чарбалык каналдарды, арыктарды тазалоо планы 96 пайызга аткарылды. Жалал-Абад облустук бассейндик суу чарба башкармалыгынын карамагындагы 613,2 чакырым чарбалар аралык каналдардын ичинен 601,6 чакырым аралыгы сугат суу өткөрүүгө даярдалган же 98,1 пайызга аткарылган.

Облус боюнча сугат тармактарын жазгы сугат убагына даярдоого 52 даана атайын техника жана 485 жумушчу тартылган.

Автор: Мальвина Уметбекова