Бишкек хореографиялык училищесинин директору өз эрки менен жумуштан кетүү боюнча арыз жазды

"Бишкек хореографиялык училищесинин директору Саида Кудайбердиева өз эрки менен жумуштан кетүү боюнча арызын жазды. Учурда арыз министрликте каралууда",- деп билдирди бүгүн, 27-майда КРнын Маданият, маалымат жана туризм министрлигинин басма сөз кызматы.

Белгилей кетсек, аталган окуу жайдын окутуучусу, КРнын Эмгек сиңирген артисти Аида Ахмадалиева директордун жүргүзүп жаткан ишине нааразы экендигин айтып, 23-майдан бери ачкачылык жарыялаган эле.

Бүгүн, 27-майда окутуучу ачкачылыгын токтотконун кабарлады. "Мага бүгүн ЖКнын вице-спикери Асия Сасыкбаева келип жолугуп кетти. Окуу жайдын абалы менен да таанышты. Ал өз сөзүндө бул маселелер чечилерине сөз берди. Ушундан кийин мен ачкачылыгымды токтотуу чечимине келдим",- дейт.

Автор: Дамира Арстанова