Бишкекте 25-май күнү №4-төрөт үйүндө дени сак төрөлгөн ымыркайдын өлүмү катталган. Жүрөгү ачышып,
өзөгү өрттөнүп турган ымыркайдын энеси Нурзада Садырбаева көз жашын тыя албай төмөнкүлөрдү
айтып өттү.
"УУЛУМ ДЕНИ САК ТӨРӨЛГӨН, МУНУ ДАРЫГЕРЛЕР БИР НЕЧЕ ЖОЛУ АЙТЫШКАН"
"Мен 20-май күнү саат
14:30 чамасында көз жардым. Баламдын салмагы 3,5 килограммды түзүп, аны көргөн дарыгерлер дени сак экенин
айтышкан. Төрөт үйүндө 3 күн бою баламдын абалы жакшы эле болчу. Жоош эле,
көп деле ыйлачу эмес. Курсагы ток болсо тынч эле жата берчү. 4-күн дегенде
уулумдун бетине майда темгилдер чыгып кетти. Аны дарыгерге көрсөтсөм, "супрастин берип кой" деди. Ошентип, дарыгердин дайындоосу менен аталган дарыны бердим. Эртеси биз төрөт үйүнөн чыкмакпыз. Кийим-кечегибизди чогултуп, кетебиз деп
даярданып алдык эле. Бирок ал күнү баламдын денеси саргарып кетти. Аны көргөн дарыгер “Мен силерди чыгара албайм,
каякка шашып жатасыңар? Биротоло айыгып, анан кеткиле” деди. Мен күйөөмө чалып, чыкпай калганыбызды айтсам, ал ачууланып калды",
- дейт Н.Садырбаева.
Ошентип, эне менен уулу
төрөт үйүнөн чыгар күнү ымыркайдын денеси саргарып кетти деп патология бөлүмүнө которушкан. Аталган бөлүмдүн башчысы баланын ден соолугу
жакшы экендигин жана фотолампага жаткандан кийин өтүп кетерин айткан.
"УКОЛ САЙГАНДЫ БИЛБЕЙТ
ЭКЕН" ДЕГЕНДЕ АГА МААНИ БЕРГЕН ЭМЕСМИН"
"Баламды көргөн дарыгер "саргарганы
өтүп кетет, ага кабатыр болбо" деп мени
тынчтандырып койгон. Балам башына дары
тамчылаткыч аркылуу дары алып, андан кийин фотолампага жаткырылып жатты. Жекшемби
күнү нөөмөткө Назира аттуу медайым келди. Жанымда жаткан Ширин мага келип, “Бул
медайым уколду туура эмес сайып коюптур. Кызыма теринин алдына сайып салыптыр”
деп калды. Мен "ал коркунучтуу деле эмес го, тарап кетет" десем, “бул медайым укол сайганды жакшы билбейт экен, мен өзүм медицина жаатында окуйм” деп калды. Бирок мен
ага деле көп маани берген эмесин. Байкашымча, башка медайымдардын
халаттарында аты-жөнү менен таанытмалары илинип турчу. Ал эми аныкы
жок болчу. Жадакалса кол кап да кийбей, башында эч кандай чепчиги жок, гигиеналык эрежелерди сактабай
жүргөн. Көп өтпөй менин балама да кезек жетип калды. Мен баламды буга чейин
дарыгердин айтуусу боюнча эмизчүмүн. Ал уктап калды". Ал кошумчалагандай, ымыркай уктап калган учурда эне күйөөсү келгенине байланыштуу сыртка чыгып, аны менен 20 мүнөткө жакын сүйлөшүп турат. Нурзада палатасына келе жатканда
медайым аны коридордо күтүп турган экен.
"КАРА КӨК БОЛУП КАЛГАН БАЛАМА МЕДАЙЫМ
ЭЧ КАНДАЙ ЖАРДАМ КӨРСӨТӨ АЛГАН ЖОК"
"Ага чейин мен айткан нерселерге медайым ачууланып “азыр урушуп кетебиз, керек
болсо азыр сыртка чыгарып коём” деп жаткан. Палатага кирип уктап жаткан
уулума дары тамчылаткыч коюп баштады. Бирок ал алгачкы 3 аракетинде тең ийнени киргизе алган жок. "Эгер сиз сая албасаңыз, башка дарыгерди чакырыңыз" дедим. Ал айтканыма көнбөй, 4-жолку аракетинде баланын баш сөөгүнө сайганда уулум чаңырып ыйлай баштады. Ал такыр
сооронбой жатты, түшүнбөй турган мага "балаңды соорот" деди. Бала ыйлап жатканына карабай медайым сыртка жөнөдү. "Баламды карап бериңиз,
эмне болуп жатат?" деп кайрылганымда, "бөтөлкө менен суюктук бер” деди. Мен балага эмчек сүтүн эмизеримди айттым. Медайым баланын оозуна глюкоза тамчылатсам сооронорун айтты. Мен глюкозаны тамыза электе эле баламдын тулкусу толугу менен көгөрө баштады. Анын өңү кара көк тартып, дем албай калды. Мен титиреп, кыйкырынып, эмне кыларымды билбей калдым. Медайым эч кандай
жардам көрсөтө алган жок. Анын шалаакылыгынан уулумдан айрылганыма ичим
ачышат".
Уулун жоготкон эненин айтымына караганда, ал коридорго чыгып кыйкырып
дарыгер издегенге мажбур болгон. Бирок эч кимди тапкан эмес. 5 бөлүм боюнча ал күнү бир
гана жандандыруу бөлүмүнүн дарыгери жана медайым болгон.
"ДАРЫГЕРЛЕР ИШЕНИЧТЕН КЕТИШТИ. ОШОЛ СЕБЕПТҮҮ УУЛУМДУ СОТТУК-МЕДИЦИНАЛЫК ЭКСПЕРТИЗАГА
БЕРГЕН ЖОКПУЗ"
"Арадан 15-20 мүнөт өтүп кетти. Баламды көргөнү келген дарыгерлер убакытты чоюп жатышты. Мен уулумдун жанынан кете албай турдум. Дарыгерлерге "карап көргүлөчү" деп жалдырап жаттым. Бирок балам кара көк тарта баштаган маалда эле каза болгон болуш керек. Жаныма келген бөлүм башчы мени кучактап “кечирип кой” деп
ыйлап жиберди. Ал “мага ымыркай чарчап калды деп чалганда сенин балаң деп
ойлобопмун, себеби абалы начар ымыркайлар бар болчу” деди.
Уулумду соттук-медициналык экспертизага бергиле дешти. Биз
андан баш тарттык, себеби, биринчиден, дарыгерлерге ишенбей калдык. Бергенде деле анын жыйынтыгы адилеттүү чыгат дегенден алыспыз. Ал жакта деле дарыгерлердин тааныш-билиштери бар да. Дени сак төрөлгөн балабыздын жансыз денесин антип
бузганда эмне?"
"КЕЧИРИМ СУРАГАНДАРЫНЫН КЕРЕГИ ЖОК, АЛ МАГА УУЛУМДУ КАЙТАРЫП БЕРБЕЙТ!"
"Мындай болорун билсем алып келбейт болчумун. Дарыгерлерге ишенип, баламды биротоло айыктырам деп андан айрылып отурам. Килейген 5 бөлүмдү бир дарыгер
менен медайым кантип тейлемек эле? Баарына жетишем деп шашкалактап эмнени
кыйратмак эле? Андай жаңы төрөлгөн ымыркайлар менен татыктуу адистер иштеш
керек. Кечээ, 26-майда төрөт үйүнүн бөлүм башчылары, акушер жана дарыгерлери үйгө
кечирим сурап келишти. Ал эми келбеген медайым шок болуп калганын айтып, жалган
шылтоолорду айтышты. Мага алардын кечирим сураганынын кереги жок. Ал баламды тирилтип бербейт. Мен болгону ал төрөт үйүндөгү өз ишин билбегендердин баары жумуштан кетсе дейм. Бир да эне мендей болуп көз жаш төгүп, баласынан
айрылбаса деп гана тилейм. Биз ал медайымды соттотсок да жарашчудай. Менимче, ар бир адис өз
жумушун так билиши зарыл. Ошондой болгондо гана мындай кайгылуу окуялардын
саны төмөндөйт".
ТӨРӨТ ҮЙҮНҮН ЖЕТЕКЧИЛИГИ КОММЕНТАРИЙДЕН БАШ ТАРТТЫ
Тилекке каршы, экинчи тараптын оюн билүү үчүн барганыбызда №4-төрөт үйүнүн башкы дарыгери комментарий берүүгө макул болгон жок. Башкы дарыгер Алмазбекова Бурул иш бөлмөсүнөн чыккан жок. Бир топ убакыт кетпей күтүп турганыбызда, катчысы аркылуу эч кандай
маалымат бере албасын айттырды. Жадакалса төрөт үйүнө бүгүн келип кеткен комиссия текшерүү иштеринин жыйынтыгын да
айтуудан баш тартты.
