Бишкекте 40ка жакын орто мектепте окуучулардын эс алуу лагерлери уюштурулат

Балдардын жайкы эс алуусу боюнча иш-чаралар 2014-жылдын 5-июнунан 2-июлуна чейин өткөрүлөт. Учурда борбор калаанын 39 орто мектебинде эс алуу лагерлери уюштурулган. Бул тууралуу бүгүн, 28-майда мэриянын басма сөз кызматынан билдиришти.

Маалыматка ылайык, шаар боюнча эс алуу лагерлеринде 2530 бала эс алат. Бекитилген режимге ылайык, жайкы эс алуу лагерлери саат 8:00дөн 14:00гө чейин иштемекчи. Лагерге келген балдарга эртең менен жана түштө тамак берилет. Ар бир баланын тамагына 44 сом өлчөмүндө каражат жумшалары маалым болду.

Иш-чаралардын планына ылайык, балдардын чыгармачылык борборунун 6700 баланы камтыган 179 ийрими эс алуучулар менен иш алып барат.

Тендерлер өткөрүлгөндөн кийин балдар шаар четиндеги лагерде жана Ысык-Көл жээгинде эс ала алышат.

Автор: Мальвина Уметбекова