Бишкектеги республикалык китепканада балдарга арналган иш-чаралар уюштурулду

Бүгүн, 29-майда Бишкектеги К.Баялинов атындагы китепканада АКШнын Кыргызстандагы элчилиги тарабынан басылып чыгарылган жаңы кыргызча китептердин бет ачар аземи болуп өттү.

Иш-чарага АКШнын Кыргызстандагы элчиси Памела Спратлен, КРнын Маданият, маалымат жана туризм министрлигинин өкүлдөрү, жазуучулар катышты.

Иш-чара 1-Июнь - Балдарды коргоонун эл аралык күнүнө карата уюштурулган. Аземге Бишкектеги жана Чүй облусундагы балдар үйүнүн тарбиялануучулары чакырылып, аларга майрамдык программа тартууланды.

Аземдин жүрүшүндө катышуучулар Луиза Мэй Олкоттун «Кичинекей айымдар», Пэм Муньос Райандын «Эркиндикти минип», Лоис Лоуринин «Берүүчү» аттуу китептеринин котормосу менен таанышышты.

Ошондой эле китепкананын аймагында балдарга сүрөт тартууга, китеп окууга, театралдык көргөзмө көрүүгө мүмкүнчүлүк түзүлдү.

Бул тууралуу КРнын Маданият, маалымат жана туризм министрлигинин басма сөз кызматы билдирди.

Автор: Динара Абдыкадырова