Ымыркайын дааратканага таштаган келин энелик укуктан соттон кийин гана ажыратылышы мүмкүн

"Токтогул шаарында ымыркайын дааратканага таштаган келин энелик укуктан соттон кийин гана ажыратылышы мүмкүн. Ага карата "жаңы төрөлгөн баласынын өмүрүнө кол салуу" беренеси менен кылмыш иши козголгон эле. Азыркы тапта ал келин ооруканада дарыланып жатат. Анын жанында биздин кызматкерлер бар. Баланын абалы жакшы. Учурда тергөө амалдары жүрүүдө". Бул тууралуу SUPER.KG порталына 3-февралда Токтогул РИИБинин башчысы Рысбек Ашыралиев билдирди.

Айта кетсек, окуя 27-январда саат 21:47 чамасында болгон. Ал жерге Өзгөчө кырдаалдар министрлигинин №97-өрт-куткаруу бөлүмүнүн жана Токтогул райондук ички иштер башкармалыгынын кызматкерлери келишкен.

Даараткананын жанында көп кабаттуу үйлөр жайгашкан. Ал жерде жүргөн жашоочулар кечинде баланын ыйлаган үнүн угуп калышкан. Дааратканадан ымыркайды жергиликтүү тургун Жапар уулу Асанкул чыгарып, дарыгерлерге берген. Тергөөнүн жүрүшүндө кылмышка шектүү аял кармалган. Анын мурун ажырашканы жана бир баланы тарбиялап келгени аныкталды.

Автор: Айпери Ганыжан кызы