Чоң-Алай районунда 3-майдан бери болуп жаткан жер титирөөдөн улам миңге жакын турак жай жабыркады

Чоң-Алай районунда 3-майдан бери болуп жаткан жер титирөөдөн улам миңге жакын турак жай жабыркады. Бул тууралуу бүгүн, 6-майда Өзгөчө кырдаалдар министрлигинен билдиришти.

Маалыматка караганда, 5-май күнү Жарандык коргонуу комиссиясы жер титирөөнүн кесепеттерин аныктоо максатында изилдөө иштерин жүргүзүшкөн. Анын жыйынтыгында Чоң-Алай районундагы Жекенди айыл аймагында жалпы 960 турак жай жабыркаган. Анын ичинен 106 турак үй 1-категорияга, 201 турак үй 2-категорияга, 295 турак үй 3-категорияга, 353 турак үй 4-категорияга, 4 үй 5-категорияга киргизилген.

Айта кетсек, 3-май жана 5-май күндөрү Кыргыз-Тажик чек арасында күчү 7 баллга чейин жеткен бир канча жер титирөө катталган. Жергиликтүү тургундар турак үйлөргө түнөөдөн коркушуп, чатырларда күн кечирип жатышат. Аталган жерде 6-майга караган түнү да жер титиреди.

Автор: Бекжан Рыскулов
Фото: ӨКМнын басма сөз кызматы