Жанар Акаев Жээнбековду колдоорун айткан Зилалиев отставкага кетиш керек деди

Баткенде актив менен жолугушууда президенттикке талапкер Сооронбай Жээнбековду шайлоодо колдоорун айткан Дүйшөнбек Зилалиев отставкага кетиш керек. Мындай билдирүүнү бүгүн, 22-сентябрда Жогорку Кеңештин депутаты Жанар Акаев жасады.

"Укук коргоо органдары тергей турган факт болуп жатса, кантип премьер-министрдин Зилалиевге эскертүү берүү менен эле чектелгени мага түшүнүксүз. Вице-премьер-министр президенттикке талапкерге үгүттөө менен чектелбей, мамлекеттик кызматкерлерге алардын айлык маяналары бюджеттен бөлүнөрүн эскертип коркутуу көрсөтүүдө. Бул кишиге административдик ресурсту пайдалануу менен күрөшүү милдети жүктөлгөн эле", - деди Акаев.

Андан соң ал премьер-министр Дүйшөнбек Зилалиевди отставкага кетирип, бул ишти укук коргоо органдарына тапшырыш керек экенин айтты. " Мындан ары биздин эл Сапар Исаковдун өкмөтүнүн таза жана адилеттүү шайлоо өткөрө ала турганына ишене албайт", - деген оюн айтты депутат.

Билдирүүсүнүн аягында Акаев президент Алмазбек Атамбаевге кайрылып, шайлоодо мыйзамдуулуктун сакталышын камсыздоону суранды.

Эскерте кетсек, вице-премьер-министр Дүйшөнбек Зилалиев шайлоону уюштуруу боюнча республикалык штабдын башчысы болуп 19-сентябрда Баткен облусунун активи менен жолугушууда КСДПнын талапкерин колдоорун айткан.

Автор: Нургазы Аматов