Бишкек-Ош унаа жолунда кардын калыӊдыгы 1 метрден ашты. Бул тууралуу бүгүн, 11-январда Өзгөчө кырдаалдар министрлигинен билдиришти.
Маалыматка караганда, Бишкек-Ош автоунаа жолунун 121-128-чакырымдарындагы Төө-Ашуу ашуусунун түндүк тарабында кардын орточо калыӊдыгы 22-55 сантиметр, түштүк тарабында 63-115 сантиметрди түзгөн. Ал эми Бишкек-Ош жолунун 198-246-чакырымдарындагы Ала-Бел ашуусу жана Чычкан капчыгайында кардын орточо калыңдыгы 25-105 сантиметрге жетти.
Ушундай эле көрүнүш Өтмөк-Талас, Ала-Бука-Каныш-Кыя, Кара-Кулжа-Алайкуу, Бишкек-Торугарт, Нарын-Казарман, Каракол-Эңгилчек автоунаа жолдорунда дагы катталган. Айрым жерлери тайгак болуп, муз тоңгондуктан жолдорго кум чачуу иштери жүргүзүлүүдө.