Бүгүн, 23-январда Бишкекте аймактарды өнүктүрүү боюнча жумушчу топтун жыйыны өтүүдө. Анын жүрүшүндө жергиликтүү кеңештердин депутаттарынын сабатсыз болуп жаткандыгы айтылды.
Өкмөттүк аппараттын уюштуруу иштери жана аймактык башкаруу бөлүмүнүн орун басары Жетиген Бакировдун айтымында, жергиликтүү кеңештердин депутаттарынын айрымдары өз милдеттерин так билбейт.
"Эмне үчүн депутат болуп келгенин сурасаң "депутаттар айыл башчыны шайлайт экен, бир аз акча алып алыш керек" деп айткандары болду. Элементардык этикаларды сакташпайт. Бир жерге барышса "кофе-брейк барбы?" деп сурашат. Андан сырткары аларга көп эле жолу окуулар өткөрүлөт. Бирок жыйынтыгы жок болууда", - деди Бакиров.
Буга чейин жумушчу топтун жыйынында президент Сооронбай Жээнбеков да баяндама жасап, жергиликтүү кеңештердеги көйгөйлөргө токтолгон. Ал айыл өкмөт башчысын же шаар башчысын шайлоодо жергиликтүү кеңештин депутаттары жөндөмсүз болуп жатканын белгилеген.