Боронов: "Өзгөндө көчкү болгон аймактан адамдар көчүп чыкпай жатат"

"Өзгөндө көчкү болгон аймактан адамдар көчүп чыкпай жатат" деди бүгүн, 25-январда Жогорку Кеңештин жыйынында өзгөчө кырдаалдар министри Кубатбек Боронов. Министр өткөн жылы көчкү катталып, чоң коркунуч жаралган аймакта эл коопсуз аймакка көчпөй жатканын айтты.

"Ничке-Сайда былтыр бир үйдү көчкү басып калган, айыл үстүндө коркунучтуу жер бар. Бирок эл толук көчүп чыга элек. Өткөн жылы 30дан ашык үй-бүлөнү убактылуу көчүрүп чыкканбыз. Кийин башка жактан жер бөлүнгөн. Бирок алар өз айылына кайрадан барып, ошол боюнча көчүп чыга элек. Өткөн жылы кандай абал болсо, ошондогудай коркунуч бүгүн да Ничке-Сайда сакталып турат. Элдин көчпөй жатканынын биринчи себеби шарттар канааттандырбайт. Мурункудай жер иштетүүгө шарты болбойт. Экинчиден, жайыты туура келбейт. Менимче, элге берилген жерлер жакпай жатат", - деди Боронов.

Эскерте кетсек, 26-мартта таңга жуук Ош облусунун Өзгөн районундагы Ничке-Сай айылынын Топ-Жаңгак участкасында жер көчүп, бир турак жайды басып, төрт балалуу үй-бүлө көчкү алдында калган.

Автор: Мунарбек Жоргомов