ЭЛЧИ КЫЛЫЧБЕК СУЛТАН ТИМдин МЫЙЗАМСЫЗ БУЙРУГУНА НААРАЗЫ
Өткөн аптанын жума күнү, 9-февралда Кыргыз мамлекетинин Корея Республикасындагы атайын жана толук ыйгарымдуу элчиси Кылычбек Султан социалдык тармактагы баракчасына Тышкы иштер министрлигинин мыйзамсыз буйругуна нааразы экенин билдирип жазган. Анын айтымында, министрлик элчиликке Инчон шаарына келе турган расмий эмес делегацияны аэропорттон тосуп алуу тапшырмасын берген. Ошондой эле Кылычбек мырза "элчилик аэропорттон бирөөлөрдү тосуп алуу менен алектениши керекпи?" деп суроо салган.
Бул билдирүүдөн кийин 24.кг сайты "ТИМ элчиликти бейрасмий делегацияларды тосуп алууга мажбурлап жатат" деген аталышта кабар жазса, ал эми Говори.тв сайты Тышкы иштер министрлигине шилтеме берүү менен "Түштүк Кореяга делегацияны министрлик Мамлекеттик спорт агенттиги жана Улуттук олимпиадалык комитети жибергендигин жана ал делегацияда Кышкы Олимпиада оюндарына катыша турган спортчулар болгондугун билдирди" деп жазып чыккан.
Андан көп өтпөй элчи Кылычбек Султан социалдык тармактагы баракчасына "Тышкы иштер министрлиги бузукулардан тазаланышы керек" деп сөзүн баштап, аталган министрликте кимдир бирөө дезинформация кылып жатканын билдирген. Анын наарызычылыгы Кышкы Олимпиада оюндарына катыша турган спортчуларды тосуп алууга байланыштуу эмес эле, эки офицерди күтүп алуу боюнча тапшырма болгонун жазган. "ТИМ элчиликке спортчулардын багыты тууралуу эч кандай тапшырма да, маалымат да берген эмес. Мен өзүм спортчулардын байланыштарын таап, качан келерин билип, Кореяда биздин Баатырларды тосуп алууну демилгеледим. Ушундан улам менин Малайзиядагы элчилик кызматынан кеткеним эске түштү. Ошондо да ушул эле "дезинформатор" элчиликтин жабылып жаткандыгы жана менин отставкам ошого байланыштуу экендиги тууралуу маалымат тараткан. Элчилик иштеп жатат... Арадан 2 жыл өттү! Урматтуу, Сапар Жумакадырович, урматтуу Эрлан Бекешович, сиздер бул "дезинформаторлорго" карата, ошондой эле ТИМде мыйзамсыз тапшырма бергендерге чара көрөсүздөр деп ниет кылам", - деп кайрылган элчи.
Бул билдирүүдөн кийин Тышкы иштер министрлигинин маалымат департаментинин директору
Муратбек Азымбакиев жооп берди. "
Бул жерде элчи "биз Кореяга келе жаткан бардык мекендештерди тосуп алуу менен алек болбой, жогорку даражадагы жолугушууларды уюштурушубуз керек" деп жазып жатат. Бул туура эмес. Биздин мыйзамдар боюнча элчиликтер, консулдук мекемелер чет өлкөгө барган бардык жарандарга расмийби же расмий эмеспи, колунан келишинче, жардам көрсөтүүгө укуктуу жана милдеттүү", - деген ал. Муратбек Азымбакиев Кореяга бара жаткан офицерлердин курамы, иш сапарынын максаты боюнча маалымат берген эмес.
Кылычбек Султан буга
"ГОСУДАРСТВО ТӨЛӨП БЕРЕТ!" Урматтуу мекендештер, чет өлкөгө чыгарда Тышкы иштер министрлигине кайрылгыла! Сиз бараткан өлкөдөгү элчилик тосуп алат. Анткени элчиликтин милдети ушундай экен" деген жоопту социалдык тармактагы баракчасына калтырган.
ШИБЕГЕНИ КАПКА КАТА АЛБАЙСЫҢ...
10-февралда “Кыргызстан дипломаттары” бирикмесинин төрагасы, Кыргыз өлкөсүнүн Тажикстан жана Беларустагы мурдагы элчиси Эрик Асаналиевдин элчинин билдирүүсүн сынга алганын "Азаттык" жазып чыкты. Анын айтымында, Кылычбек Султандын билдирүүсү мамлекеттик кызматкердин жана дипломатиялык кызматкердин этикасына туура келбейт.
“Ар бир элчи Кыргыз өлкөсүнүн ар бир жаранынын кызыкчылыгын коргоо, кызмат кылуу үчүн ошол мамлекетке жөнөтүлгөн. Ал өлкөнүн ар бир жараны төлөгөн салыктын эсебинен каржыланат. Ошого жараша мамлекеттик орган тапшырма берген соң аны аткарууга тийиш”, - деп билдирген Асаналиев.
Эрик Асаналиевдин билдирүүсүнө элчи Кылычбек Султан социалдык тармактагы баракчасына мындай жооп узатты: "Эрик Асаналиев мырза, сиз элчинин кызматынабы же дайындоо боюнча эмес пайдаланылып жаткан дипломаттар үчүн тынчсызданып жатасызбы? Эгер сизге жана айрым "карьера керек болгон" дипломаттар үчүн кимдир бирөөнү аэропортто коштоп, аларга шоппинг боюнча гид болгон жакса жана аны "карьералык дипломатия" катары көрсөңүз, сизге кесибиңизди өзгөртүүнү сунуш кылам. Эгер сиз чындап дипломаттардын кесиби үчүн кабатыр болуп жатсаңыз, мен башында белгилеп кеткендей, расмий эмес делегацияны аэропорттон тосуп алып, коштоо боюнча мыйзамсыз тапшырмага басым кылмаксыз".
Ушундай маалымат менен сөзүн толуктады.
Ошондой эле ага чейин Кылычбек Султандын социалдык тармактагы баракчасына жазылган посттордогу талкуулардан улам ал ведомство ичиндеги маселелерди эл көзүнө чыгаруу боюнча төмөндөгү пикирин жазган: "Мен мындай иштерди жашыргым келбейт. Бул иш тартибинде эч кандай чечилбеген маселелердин чети гана...".
Андан ары "Азаттык" "Эркелеген аткаминерлерге убактым жок" деген аталышта маек жарыялады. Анын урунттуу учурларын ала турган болсок, элчинин пикиринде "Келгендерди тосуп алуу элчиликтин милдети эмес. Эгерде муну элчиликтин милдети катары карай турган болсок бул жакта биздин беш миңге жакын жараныбыз жашайт. Анда баарына тең караш керек". Андан ары Кылычбек Султан мындай көрүнүштөргө чекит коюлушу керектигин, убакыт бул чоң ресурс экендигин айтып, аны мамлекеттин кызыкчылыгы үчүн колдонуу зарылдыгын баса белгилеген.
ТИМдин ПИКИРИНДЕ КЫЛЫЧБЕК СУЛТАН КАТА КЕТИРДИ
Бүгүн, 12-февралда Тышкы иштер министрлиги Түштүк Кореядагы элчи Кылычбек Султандын билдирүүсүнө байланышкан маселени карай турганын билдирди. Аталган мекеменин маалымат департаментинин жетекчиси Муратбек Азымбакиевдин “Азаттыкка” айтканы боюнча, Кылычбек Султан өз билдирүүсү менен “ката кетирип койду”. "Алар Түштүк Кореяга расмий иш-чарага бараткан аскер адамдары болчу. Аны биздин департаменттин директору "Кыргыз өлкөсүнөн ушундай адамдар баратат, колдон келсе, көмөк көрсөткүлө" деп кат жазган. Ал ката кетирип койду. Элчи болуп иштеп жаткандан кийин биздин мамлекеттик кызмат тууралуу мыйзамга толугу менен баш ийет. Анда мамлекеттик кызматкер эмнени жасай алары, эмнени жасай албай тургандыгы жазылган. Эмне үчүн ал биздин департаменттин директору кол койгон ички документти ачыкка чыгарат?" - деген Азымбакиев.
Буга улай эле "Азаттык" өткөн аптанын жума күнүнөн тарта уланып келе жаткан бул окуянын тегерегинде кенен макала жарыялады. Анда элчи Кылычбек Султан "дипломаттын этикасын бузду" деген дооматтарга каршы экендигин мындайча түшүндүргөн: "Дипломаттын этикасы" деген кооз сөз болгону менен маңызын караш керек да. Эгер ошону этика деп атай турган болсо, ал кыргыз элине кандай пайда алып келип жатат? Зыяндан башка пайда алып келбей жатса, аны биз "этика" деп кооз сөз менен жаап-жашырып отурганыбыздын кереги жок".
