Түркмөнстанда мамлекеттик дүкөндөр коммуналдык кызматтардан карызы бар жарандарга ун сатпай жатат

Түркмөнстанда жаратылыш газы жана электр жарыгынан карызы бар жарандарга мамлекеттик дүкөндөр ун сатпай жатат. Бул тууралуу жергиликтүү басылмалар жазып чыгышты.

Белгилүү болгондой, дүкөндөр сатып алуучулардан үйүндөгү коммуналдык эсептегичтери тууралуу документти да талап кылышууда.

"Ким жогоруда аталган тактама жана документтерди көрсөтпөсө, анда ал жаранга ун сатылбайт. Өлкө аймагындагы кээ бир райондордо 2 айдан ашуун убакыттан бери унга болгон баанын өсүшү жана дефицити байкалган. Мындай чектөөлөр жергиликтүү же Казакстан менен Иран өлкөлөрүнөн алынып келген буудайдан өндүрүлгөн унга киргизилип жатат. Анткени мамлекеттин көзөмөлүндөгү дүкөндөр аталган продукцияны арзан баада сатышууда", - деп жазылат маалыматта.

Ошондой эле учурда мындай чектөөлөргө карата жарандар нааразычылыктарын билдирип, жергиликтүү бийликтин астына чогулуп жаткандыгы маалымдалат. Бийлик элди тынчтандыруу максатында атайын түшүндүрүү иштерин аксакалдар кеңешинин жардамы менен жүргүзүп, милиция кызматкерлери коомдук тартипти көзөмөлдөп жатканы кабарланган.

Автор: Айнуска Жороканова