Жээнбеков "чык, эшикке" деп жыйындан чыгарып жиберген жетекчини Сапар Исаков жумуштан алууну чечти

Бүгүн, 22-февралда өкмөттүн жыйынында бир катар өкмөт мүчөлөрүнө сөгүш жана эскертүү берилди. Өкмөт башчы Сапар Исаков вице-премьер-министр Дайыр Кенекеевдин сунушун колдоп, бардык кемчиликтерди жоюу үчүн тиешелүү аткаминерлерге июнь айына чейин убакыт бериле турганын айтты. Сунушка ылайык, архитектура, курулуш жана турак жай коммуналдык чарба мамлекеттик агенттигинин статс-катчысы Самат Бөрүбаевге сөгүш, финансы рыногун жөнгө салуу жана көзөмөлдөө мамлекеттик кызматынын статс-катчысы Шамшиев Абдухалыкка сөгүш берилди. Маалымат берүүдө, коррупциялык иш-аракеттерге бөгөт коюуда натыйжа көрсөтө албаган кызмат адамдарына эскертүү берилди.

Эскертүү алгандар:

1. Саламаттыкты сактоо министри Талантбек Батыралиев,

2. Юстиция министри Уран Ахмедов,

3. Маданият, маалымат жана туризм министрлигинин статс-катчысы Бактыбек Секимов,

4. Маалыматтык технологиялар жана байланыш мамлекеттик комитетинин төрагасы Нурбек Абасканов,

5. Мамлекеттик мүлктү башкаруу фондунун статс-катчысы Илияз Ташбаев,

6. Курчап турган чөйрөнү коргоо жана токой чарбасы мамлекеттик агенттигинин статс-катчысы Азамат Эркебаев.

Сапар Исаков эскертүү жана сөгүш алган жетекчилерге, өз тармагын жолго коюу үчүн убакыт бериле турганын айтты.

"Иш толук аткарылбай жатат. Бул абдан туура сунуш, бул чечимди кабыл алышыбыз керек. Мен өзгөчө ушул жетекчилерге айтат элем, иш жолго коюлбаса бул адамдарды жумуштан бошотобуз. Эгер иштей албаса, натыйжа чыкпаса анда кармап эмне кылабыз? Мен карап чыктым, жөнөкөй аткарылбай калган жумуштар бар. Мен бул сунуштарды колдойм”, - деди Исаков.

Өкмөт башчы Сапар Исаков архитектура, курулуш жана турак жай коммуналдык чарба мамлекеттик агенттигинин статс-катчысы Самат Бөрүбаевге экинчи ирет сөгүш берилгенин негиз кылып, ага июнь айына чейин убакыт бериле турганын айтты.

"Эмне үчүн жумушка мындай көңүл кош мамиле жасалып жатат? Бул күлкүлүү эмес. Мекемеде эмне болуп жатат? Архитектура, курулуш жана турак жай коммуналдык чарбасы боюнча мамлекеттик агенттигинин жетекчисинин орун басары Алмазбек Абдыкаровду (ред: Жээнбеков жыйындан чыгарып жиберген кызматкер) жумуштан бошотуу боюнча сунушту мага алып келгиле. Силердин мекемеге карата калктан арыз, даттануулар абдан көп. Анын баарында коррупция жөнүндө сөз болуп жатат. Чечкиле, статс-катчынын да кызмат ордун карап көргүлө", - деди Исаков Мамкурулуштун башчысы Бактыбек Абдиевге кайрылып.

Эске салсак, өткөн жылдын июнь айында ошол кездеги өкмөт башчы Сооронбай Жээнбеков жаратылыш кырсыктарын жана өзгөчө кырдаалдардын кесепетин жоюу иштери талкууланып жаткан кеңешмеден Архитектура, курулуш жана турак жай коммуналдык чарба мамлекеттик агенттигинин жетекчисинин орун басары Алмазбек Абдыкаровду даярдыксыз келгени үчүн жыйындан чыгарып салган.