Шайлдабекова: "Каза болгон Калмаматовдун ордуна депутат болуп келчү Насыр Мусаев ооруп жатат"

Борбордук шайлоо комиссиясынын төрайымы Нуржан Шайлдабекова каза болгон Жыргалбек Калмаматовдун ордуна депутат болуп келчү Насыр Мусаев ооруп жатканын айтты. Бул тууралуу ал бүгүн, 27-февралда SUPER.KG порталына билдирди.

“Бул маселе каралып жатат. Насыр Мусаевге мандат бербөө үчүн эч кандай негиздер жок. Ал “Кыргызстан” партиясынын тизмесиндеги кийинки талапкер. Тийиштүү мамлекеттик органдарга жөнөткөн суроо-талаптарыбыздын айрым жооптору келди. Жакын арада чечим чыгарылат. Мыйзамда мандат берүүнүн мөөнөттөрү жазылган эмес”, - деди Шайлдабекова.

Буга чейин "Кыргызстан" фракциясынын катчылыгы Насыр Мусаев ооруп, чет мамлекетте жүргөнү боюнча кабарлаган. Ал эми комиссиянын төрайымынын орун басары Абдыжапар Бекматов тиешелүү мамлекеттик органдар БШКнын суроо-талабына жооп бере электигин айткан.

19-январда БШК каза болгон Жыргалбек Калмаматовдун депутаттык ыйгарым укуктарын токтоткон. Жогорку Кеңештин "Кыргызстан" фракциясынан депутат Жыргалбек Калмаматов ушул жылдын 1-январында каза болгон. Аталган фракциянын катчылыгы "Кыргызстан" партиясынын тизмеси боюнча депутат болууга кезекте Насыр Мусаев турганын билдирген.

Автор: Жылдыз Джускембаева