Депутат өкмөттүн энергетикага тийиштүү мыйзамга карата жасаган көңүл кош мамилесине нааразы болду

Жогорку Кеңештин депутаты Кожобек Рыспаев өкмөттүн энергетикага тийиштүү мыйзамга карата жасаган көңүл кош мамилесине нааразы болду. Эл өкүлү Отун-энергетика комплекси жана жер казынасын пайдалануу боюнча комитети өлкөнүн электр энергия тармагын жөнгө салуучу мыйзамдын жаӊы редакциясынын долбоорун экинчи окууда карап жатканда бул тууралуу айтты.

Кожобек Рыспаев мыйзам долбоорунда экинчи окуунун жүрүшүндө өкмөт тарабынан берилген 48 сунуштун 37 сунушу эске алынганын, 11 сунушка ынанымдуу жүйө келтирилбегендиктен кабыл алынбай калганын белгиледи.

"Тилекке каршы, өкмөттүн мыйзам долбоору боюнча корутундусу өтө кечигип келди, тездетүү керек болчу. Энергетика тармагында түзүлгөн азыркы кырдаалды өзүӊөр көрүп турасыӊар, ишти илгерилетпесек болбойт", - деди Рыспаев.

Мыйзам долбоорунда өлкөнүн электр энергия тармагындагы экономикалык жана технологиялык мамилелердин жаӊы укуктук негиздери, ал мамилелердин саясатын иштеп чыгуу жана жөнгө салуу чаралары, электр жана жылуулук кубатын өндүрүү, жеткирүү, бөлүштүрүү, сатуу, экспорттоо жана импорттоо жол-жоболору камтылганы белгилүү болду. Комитет бул мыйзамды экинчи окууда колдоду.

Автор: Мунарбек Жоргомов