Тогуз-Тородогу айылдык кеңештин төрагасы: "Алтын ылгоочу комбинат жабылбаса, жергиликтүү тургундар аны талкалоого даяр"

10-мартка чейин Тогуз-Тородо салынып жаткан алтын ылгоочу комбинат жабылбаса, жергиликтүү тургундар аны талкалоого даяр. Бул тууралуу бүгүн, 5-мартта маалымат жыйынында Жалал-Абад облусунун Тогуз-Торо районунун Атай айылдык кеңешинин төрагасы Уланбек Шерипов билдирди.

Анын айтымында, алтын ылгоочу комбинат элдин нааразычылыгына жана жергиликтүү бийликтин тыюу салганына карабай курулуш иштерин жүргүзүүдө.

"Биздин эл ушул комбинаттын курулушуна каршы. Комбинат кайсы документтердин негизинде курулуп жатканын биз билбейбиз. Себеби жергиликтүү кеңештин ар бир айылынын "курулбасын" деген токтомдору турат. Бул токтомдорго карабай комбинат бүгүнкү күнгө чейин ишин жүргүзүп жатат. Ошол себептен эл көтөрүлүп, каршы ой-пикирин билдирип жатат. Кыргыз Республикасынын президенти Сооронбай Жээнбеков "жергиликтүү кен байлыктар элдин макулдугу менен гана казылсын" деп айткан. Президенттин сөзүн, бийликтин буйругун булар уккусу келбейби?" - деди Шерипов.

Ошондой эле ал жергиликтүү тургундар комбинатты бузуп, талкалоого даяр экендигинин айтты.

"Тогуз-Тородо чоң көйгөй турат. Эгерде 10-мартка чейин комбинаттын курулушу мыйзам чегинде токтобосо, жергиликтүү эл митингге чыгып, комбинатты толугу менен талкалайбыз деп жатышат", - деп кошумчалады айылдык кеңештин төрагасы.

Эске салсак, 7-февралда Тогуз-Торо районунда жаңы курулуп жаткан алтын ылгоочу комбинат калк жашаган аймакта жайгашкандыктан анын тез арада жабылышын талап кылып 500дөй адам митингге чыккан.

Автор: Нурсултан Нурболот уулу
Фото: Нурсултан Нурболот уулу