Депутат Шыкмаматовдун иши карала турган соттук отурум 30-мартка жылдырылды

Бүгүн, 28-мартта Бишкек шаардык сотунда депутат Алмамбет Шыкмаматовдун соттук иши каралмак. Бирок аны менен бирге айыпталып, абакта отурган Жусуп Иманалиевдин жактоочусу Медетбек Алиевдин ден соолугуна байланыштуу отурумга келе албай калгандыгынан улам соттук жамаат ишти 30-мартта кароону чечти. Шыкмаматов отурумду 30-марттан кийин кароо өтүнүчүн келтирип, бирок сот бул өтүнүчтү четке какты.

Белгилей кетсек, "Алмамбет Шыкмаматов 2011-жылы Эсептөө палатасынын аудитору болуп турганда жеке кызыкчылыгын көздөп, аялынын Мерседес Бенц Е320 үлгүсүндөгү унаасын кымбат баага сатуу үчүн "Барат Люкс" ишканасын тендерге катышкандардын катарына кошууну демилгелеген" деп айыпталууда. Биринчи инстанциядагы сот иши Биринчи Май райондук сотунда каралып, 19-декабрда Шыкмаматовго, Эсептөө палатасынын мурдагы аудитору Жусуп Иманалиевге жана Германиянын Кыргыз мамлекетинде жашаган жараны Али Юкселге өкүм чыгарылган. Соттун чечимине ылайык, Шыкмаматов 5 миллион сом айыпка жыгылган. Иманалиев 10 жыл 6 айга күчөтүлгөн тартипте эркинен ажыратылып, мүлкү конфискацияланып, эркиндикке чыккандан кийин 3 жыл мамлекеттик жана муниципалдык кызматта иштебейт. Ал эми алар менен бирге айыпталып жаткан Юксел жазадан бошотулган. Шыкмаматов соттун мындай чечимине каршы экенин билдирип, Бишкек шаардык сотуна кайрылган.

Автор: Жамалидин Парманкулов