20-апрелде Бишкек шаарындагы Фрунзе-Панфилов көчөсүнүн кесилишине жакын жерде кыргыз жигиттеринин жүрүшү өтөт. Жүрүш кыргыз кыздарынын чет өлкөлүк жарандарга турмушка чыгуусуна каршы өтө турганын SUPER.KG порталына уюштуруучу Тилек Таалайбеков билдирди.
Жакында эле социалдык тармактарга Түркиянын Ван шаарында жашаган этникалык Кадыр аттуу кыргыз жигиттин Кыргыз кыздарынын кор болгону тууралуу айткан видеосу тараган. Ал жакшы иштерде иштеген Кыргыз кыздарынан тышкары саунада, жатаканада эркектерге кызмат көрсөткөн 20 жаштагы кыздардын да көп экенин айткан. Ошондой эле ал түркиялык досторунан Кыргыз кыздары жеңил ойлуу деген пикирди укканда уяла турганын, бардыгыбыз намыска келишибиз керек экенин кошумчалаган.
Таалайбековдун айтымында, бир топ жылдан бери Кыргыз жигиттеринин тобу кыздардын башка улуттун жигиттерине кор болушун алдын алуу иштерин жүргүзүп келишет. Ушундай максатта Түркияда жашаган кыргыздардан абалды айтып, видео жөнөтүшүн суранышкан. Көп өтпөй Кадыр аттуу жигиттин кайрылуусу жооп катары келген.
"Мен өзүм чет элдин көп шаарларында иштедим. Ал жактагы абалды аябай жакшы билем. Ошол жерде көп кыздардын башка улуттун жигиттерине алданып, сабалып, төрөп, баласын таштап кеткенин көрүп зээним кейичү. Кийин мендей болуп кейип жүргөндөр топ түзүп алдык. Биз кыздарга орой мамиле жасап же видеого тартып уяткарбайбыз. Тескерисинче, укугун коргойбуз, кыргыз кыз-келиндеринин сыртка чыгуусуна аргасыз кылып жаткан жагдайлардын азаюусуна аракет кылабыз", - деди Таалайбеков.
Жүрүшкө чыга турган жигиттердин максаты:
1. Өтө жаш кыздардын чет элге иштеш үчүн чыгуусун токтотуу;
2. Чыкса, атасы же энеси, күйөөсү, тууганы менен кошо кетүүсүн кароо;
3. Кыргыз жеринде ажырашкан эркектерге айып салуу, алименттин суммасын көтөрүү жана аны кечиктирүүсүз милдеттүү түрдө төлөтүү.
"Бүгүнкү күндө бул маселе бышып жетилди. Дагы бир ачуу чындык - кыргызды кыргыз эле сатат. Биздин топтогу жигиттерге канчалаган кыздар жардам сурап кайрылышат. Жакында эле Түркиядан 2 эжекебиз качып келди, баштыктарын бүт таштап келишиптир. Алар Түркиянын Эдем деген Сирияга жакын шаарына жакында эле барышкан. Жаман иштерде иштей турганын билгенде качып келишип, абалды айтып беришти. Алардын айтымында, "Офис" деп атап койгон жер бар, анда жүздөгөн кыздар иштешет. Кыздарга аябай жаман мамиле жасалгандыктан ачкалыктан ооздоруна учук чыгып кеткендери бар. 2 жаш кыргыз кызы боюна бүтүп калып, ата-энесине кайрылганда алар жолго акча салып, кайра чакырткан.
Москвада кыргыз кыздарын топтоп, Түркияга саткан кыргыз келинди билем. Ал кыздарды иштеткен жайды текшерүү үчүн биз өзүбүздүн бир кызды "иштеген кыз" катары киргизгенбиз. Ал эже менен мындай аракетин токтотуу тууралуу сүйлөшкөндөрүм менде сакталуу. Биз укук коргоо органдарына кайрылганга чейин эле ал кургак учук менен ооруп мекенибизге кайтып келиптир. Өзү да башка улуттагы эркектер менен жашап жүргөнүн айтышат. Учурда ооруп, абалы жакшы эмес экенин билип милицияга кайрылган жокпуз", - деди Тилек Таалайбеков.
Анын айтымында, жүрүштүн соңунда талаптар тизмектелип жазылып, иргелип Жогорку Кеңешке кайрылуу катары жолдонот.
"Биздин топтун окуп, билим алуу үчүн же жакшы карьера жасоо үчүн чет элге чыккандарга каршылыгыбыз жок. Болгону жашы, акылы толуп, өзүн алдатпай турган куракка келген кыз-келиндер чыгышы керек деген талабыбыз бар", - деп белгиледи ал.
Социалдык тармакта бул демилге кызуу талкууга алынууда. Колдонуучулардын арасында мындай жол менен кыздардын, алардын үй-бүлөлөрүнүн маселесин чечүү мүмкүн эмес экенин айткандар бар. Интернет баракчаларындагы билдирүүлөрдөн:
"Жумушу жоктор митингге чыгууну адатка айлантып алышты. Мындай жоругуңар менен жалпы кыргыз кыздарын жеңил ойлуу дегенге чыгарып жатасыңар. "Түптүз" жүрүп иштеп, бир туугандарына, ата-энесине жардам берген кыздар толтура. Алар көзгө көрүнбөйбү?"
"Силер адегенде шарт түзүп койгула анда, жумушчу орундарды түзө аласыңарбы? Андан кийин талабыңды айтсаң жарашат".
20-апрелде Бишкек шаарындагы Фрунзе-Панфилов көчөсүнүн кесилишине жакын жерде кыргыз жигиттеринин жүрүшү өтөт. Жүрүш кыргыз кыздарынын чет өлкөлүк жарандарга турмушка чыгуусуна каршы өтө турганын SUPER.KG порталына уюштуруучу Тилек Таалайбеков билдирди.
