Садыр Жапаровдун соту 13-июнда улана турган болду. 4 жактоочу Жапаров ак экенин айтты

6-июнда абактагы саясатчы Садыр Жапаровдун соттук иши каралды. Анда анын 4 жактоочусу сөз сүйлөдү.

Жактоочу Акин Токталиевдин айтуусуна караганда, Жапаровду камоо саясий буйрук болгон.

"2017-жылы Жапаровдун Кыргыз өлкөсүнө келери маалым болгондон кийин мен УКМКга кайрылып, "25-мартта сотко өзүбүз келебиз" деп мен күн мурунтан кат аркылуу кайрылганмын. Андан кийин "9-мартта УКМКга Садыр Жапаров өзү келет, провокацияга түшүп калбайлы, эгер провокация болсо, силер жооп бересиңер" деп кайрылганмын. Андан кийин Садыр Жапаров "өлкөгө келем" деп интернетке жарыялаган.

Ал келгенде баарыбыз тосуп алууга барып, Кыргыз-Казак чек арасындагы "Ак-Жолдон" тостук. Бирок аны түз эле УКМКга алып кетишти. Жапаров "мен акмын, мыйзам алдында тазамын, кааласа өлтүрүп койсун, кааласа камап койсун" деп айткан. Аны колдоо митингинде ондогон адамды кармашты. Кийин баласын, бир тууганын, 8 жакынын кармашты. Операция болуп келген инисин камап койгондо "мунун ден соолугу начар, өлүп калса силер жооп бересиңерби" десем, кийин документтерин текшерип коё беришкен. Мен жактоочу болгондон уялып калдым, анткени бизде баш аламан, адилеттүүлүк жок", - деди сотто Токталиев.

Андан кийин жактоочу Замирбек Базарбеков сөз сүйлөдү. "Садыр Жапаров ак экени белгилүү болсо да, буга чейинки соттук инстанцияларда Жапаровдун кылмыш ишине туура эмес чечим чыгарышты. Буга чейин кыйноо менен Жапаровго каршы көрсөтмө берген Калчаев, Маликов, Жумабаев жана башкалар массалык маалымат каражаттары аркылуу кыйноого алынып көрсөтмө бергенин ачык эле айтып чыгышты.

Жабырлануучу Эмилбек Каптагаев "эч кандай дооматым жок, актагыла" деп көрсөтмө берип келе жатат. Бирок ага карабастан Каптагаевге "жабырлануучусуң" деп ишти тагып келишүүдө. Жабырлануучунун, күбөлөрдүн көрсөтмөлөрүнө соттор тарабынан юридикалык баа берилген эмес. Учурда элдин Жогорку Сотко болгон ишеними чоң. Соттордон адилеттүү чечим чыгарына ишенем", - деди Базарбеков.

Жактоочу Токтобек Раимкул уулу Садыр Жапаровго кылмыш иши Эмилбек Каптагаевди барымтага алуу жөнүндө болуп жатканын, бирок Каптагаевди барымтага алгандардын тизмесинде Жапаровдун аты аталбаганын айтты.

"Чет мамлекетке чыгып кеткен Жапаров Саруу окуясын кантип көзөмөлгө алмак? Ал эми Каптагаевди барымтага алгандардын тизмесинде Жапаровдун аты аталган жок. Барымтага алгандардын койгон талабы менен Жапаровдун байланышы жок. Ал окуяда 5 милиция кызматкери ар кандай жаракат алганы айтылат, бирок буга Жапаровдун тиешеси бар экени далил менен көрсөтүлгөн эмес. Башкача айтканда, Жапаров чет мамлекетте жүрсө, бул жакта болгон окуялар тууралуу ага козголгон беренелер туура эмес болгон.

Сот иши Эмилбек Каптагаевдин арызынын негизинде козголгон эмес. Райондук сотто Жумабаев менен Жапаровдун телефон аркылуу байланышканы да далилденген эмес. Каптагаев Биринчи Май райондук сотунда "Жапаровго эч кандай доом жок, мени барымтага алган эмес" деп жатса да мындай чечимдер мыйзамсыз жана негизсиз болгон", - деди Раимкул уулу.

Төртүнчү жактоочу Эрнис Исаев Эмилбек Каптагаевдин барымтага алынганы чын экенин айтты. "Бирок ошол Саруу окуясына Жапаровдун тиешеси бар экени далилденген жок. Жапаровдун күнөөсү мекенчилдигинде, бийликтегилердин бетине чындыкты айтканында.

2017-жылы Жапаров Казакстан аркылуу чек арадан өткөнгө чейин ал издөөдө экенин эч ким билген эмес. Ал "Кумтөр" маселесин көтөрөм деп келген. Алтын менен кошо чыккан күмүш, платина жана башка эсеби жок кен байлыктын маселелерин көтөрөм деп келген. Садыр Жапаров абакта өзүнүн колун, моюнун кескен эмес, бийлик ошол жерде өлтүрө албай коюшкан. 1-абакта аны өлтүрүү үчүн 3 жолу камера котортуп, 1-2-камерада өлтүрө албай койду. 3-камерада анан өлтүрүүгө аракет кылышты. Бактысы бар экен, Садыр Жапаров аман калды. Атасы былтыр абакты айланып жүрүп Садырды көрө албай дүйнөдөн кайтты. Апасы да "баламды көрө алат бекенмин" деп абакты айланып жүрөт, буларды да эске алалы", - деп Исаев судьяларга кайрылды.

Соттук коллегия сот 13-июнда саат 15:00дө улана турганын айтты. Анда дагы 2 жактоочу сөз сүйлөмөкчү.

Эске салсак, Садыр Жапаров 2013-жылы 7-октябрда Каракол шаарында "Кумтөр" боюнча нааразычылык акциясындагы баш аламандыкты уюштурууга күнөөлөнүп, 2017-жылдын 25-мартында Кыргыз-Казак чек арасынан кармалып, камакка алынган.

2017-жылдын 2-августунда Жапаров Биринчи Май райондук сотунун өкүмү менен "барымтага алуу" беренеси боюнча күнөөлүү деп табылып, 11 жыл 6 айга эркинен ажыратылган. Райондук соттун өкүмүн Бишкек шаардык соту күчүндө калтырган.