Бишкектеги көчөлөрдүн биринен 28 жаштагы жаранды бычактап кеткендер табыла элек

Бишкек шаарынын Кулиев көчөсүндө 28 жаштагы жаранды бычактап кеткендер кармала элек. Бул тууралуу бүгүн, 6-сентябрда SUPER.KG'ге Бишкек ШИИББинен билдиришти.

Маалыматка ылайык, окуя Кулиев көчөсүндө 3-сентябрь күнү саат 11:30 чамасында орун алган. Анда 28 жаштагы Бекзат.Ж. аттуу Сузак районунун тургунун такси күтүп турган жеринен 3 жаран келип бычактап кеткен. Оор жаракаттан улам жабырлануучу окуя болгон жерден каза болуп калган.

"Бул факт боюнча кылмыш иши козголду. Учурда кылмышка шектүүлөрдү издөө иштери кызуу жүрүүдө", - деп билдиришти Бишкек ШИИББинен.

Айта кетсек, кечээ маркумдун таякеси окуянын чоо-жайын айтып берүү үчүн байланышып, жээни ИИМ Академиясын аяктап, учурда Орусиядан унаа алып келип, сатып ишкердик менен алектенип жүргөнүн билдирген. Анын айтымында, жээни ага бычак сайгандардын бири менен тааныш болгон.

Автор: Мальвина Уметбекова